Sawhthing lei tan leh hnai

Agriculture Minister PC Vanlalruata'n media mite a hrilh danin, sorkarin April 21, 2025 atangin sorkarin sawhthing a lei tan leh dawn.

Vawiin (17.4.2025) a media thenkhatin a office-a an kawmnaah Agriculture Minister chuan February 20, 2025  atanga March 20, 2025 thleng khan sorkar chuan Mizoram hmun hrang hrangah sawhthing kg.-ah cheng 50-in a lei khawm tih sawiin, 'Chungte chu tunah hian quintal 6,222 hralh a ni tawh a, hralh loh quintal 1,800 vel a la bang,' a ti.

PC Vanlalruata sawi danin, sorkarin sawhthing a lei khawlte chu auction kalpui ni mah se, a leitu zingah Mizoram lam hawi an tam loh avangin an hralh chak thei lo a, tunah hian sawhthing neitu (kuthnathawkte) an mangang em em tih sorkar chuan a hria.

Sawhthing neitute mangan/harsatna sutkianna atan hian April 21, 2025  atangin sawhthing hi sorkarin a lei tan leh dawn a, hei hi kut hnathawktu, sawhthing cho lawk tawh ho chhan chhuahna tur a ni.

Tuna sorkarin sawhthing a buaipui ang hi Mizoramah a la awm ngai lo a, tuna an buai chhan ber pawh an vawi khatna a nih vang a ni a, tuna an harsatna tawh ang chu nakkum lamah chuan a tlem tawh rin a ni.