An sawi angin ZPM an awm lo - Zoramthanga

Vawiin (21.4.2025) hian Kolasib District chhunga MNF VC tling tharte lawmpuina hun, Diakkawn YMA Hall, Kolasibah hman a ni a, an hun hmanpuitu MNF President Zoramthanga chuan ZPM-te chu an sawi angin an awm loh thu a sawi.

Zoramthanga chuan MNF VC zawng zawngte chu Pathian ṭihna nen theih tawp chhuaha khawtlang rawngbawl turin a chah a, 'Covid hripuiin min nuai a, ramri buai, vawk hri leng, kang mei, lirnghing, Burma leh Manipur, Bangladesh refugee-in min chim. Harsatna kan tawk nasa hle. Kan tum ber chu damkhaw chhuah a ni ringawt mai a ni. Khati chung khan hmasawnna nasa tak kan kalpui thei kha a lawmawm em em a, kha term-ah khan Pathian hnena lawmthu sawina tur kan ngah em em a ni,' a ti.

ZPM chu itawm chitin rengin an inzuar nia sawiin MNF President chuan, 'Bang lehlama nula aw mawi tak, amah kan la hmuhchian loh kha nupuiah Zoram mipuiin kan nei ta. Kan han vote ta ruih ruih a, kan vote tling ta a. Thil kha an sawi awl bawk a, D-A-H DAH aṭangin an ṭan a, tunah chuan an sawi loh ang hlirin an awm ta a. An sawi angin an awm lo a ni. Kum khat chuang an sorkar chhung hian sorkar hnathawkah a ni telin an tlahniam zel a, sorkar hnathawk lian an nuih a za,' tiin sorkar hnathawk lian ten 'naupang inkhuallem kan ang' an tih thu a sawi.

Zoramthanga chuan sorkar hnathawk tê deuh ho an lungawi lo mek tih sawiin, 'Cancer vei pawh an thliar tawh lo. Doctor rual an phin leh a, health care-te an ti suakbak vek a. naupang leh zirtirtute lungawi lohna a in-up chho leh mek. Sikul dinhmun sang zawka kan hlan zawng zawngte kha an cancel a, Finance Minister-in 'a theih' ka tih avanga kan tih a ni. Covid hripui lai pawhin a theih a, Covid awm loh hnuah a theih loh an ti ta si hi a mak hle. Zunteii nu ka siam ang che i tia, lungngaihna hlir lungngaihna hlir, tih ang chiah a ni. Hmunphiah sawi chuan ngaihthlak loh an duh zawk a, sawhthing thar tur zat nia an hriat kha hmun 10-a hmun khat pawh an la lei lo. Sawhthing leh thlaite hi thingtum ang a dah ṭhat a, duh hun hun a hralh tum chi a ni lo. A huna seng a, a huna hralh a ngai. ZPM sorkar hi kut hnathawktuteah a ni telin an tlahniam zel a ni,' a ti.