Sorkar hnathawkte hriattirna ti chhuak

Mizoram Sawrkarin medical reimbursement system thar a kalpui dan chungchangah Mizoram Sawrkar hnathawk inzawmkhawmna FMGE&W General Headquarters chuan zawhna eng emaw zat a dawn avangin, ni 23.4.2025-a FMGE&W Office Bearers thukhawm chuan a hnuai ami ang hian affiliated association-te hriattur thuchhuah a siam.

1. Ni 23.8.2024-a FMGE&W Special Assembly chuan 'MUHCS hi sawrkar hnathawkte min huam tir ve lo turin sawrkar ngen nise' ti-a a lo rel tawh angin Chief Minister hnenah ziakin kan thutlukna hi thlen a ni. Amaherawhchu, an hmalakna a kal zel ni a hriatna a awm avangin ni 27.3.2025-ah ziakin MUHCS hi sawrkar hnathawkte min huam tir ve lo tura ngenna kan thlen nawn leh bakah, ni 3.3.2025-ah Health Minister hmuh a ni leh. Tin, ni 7.4.2025 khan Chief Minister hnenah OB te'n Special Assembly thutlukna bak thu dang kan neih rih loh thu leh a tuk ni 8.4.2025 a General Conference-a kan sawiho tur thu thlen a ni.

2. Ni 8.4.2025-a kan General Conference-ah khan MUHCS chungchang hi ngun takin kan sawiho. Kan in chah lawk angin Association hrang hrangte pawn lo zir chiang hmasa-in, pawl thutlukna kengin palaite an lo kal kha a ni a. He kan general conference-a kan thu pass dan te kha kan lo hriat nawn atan hetiang hi a ni e:

(i) Kan medical reimbursement system hi sawrkar hnathawkte leh keimahni-a innghat kan chhungte thih leh dam thu a khawih avangin kan fimkhurin kan ngai pawimawh hle. Sawrkar pawhin a hnuaia thawkte thih leh dam chungchang hi chu a ngaih pawimawh ngei kan beisei.

(ii) Special Assembly thutlukna lo siam tawh angin MUHCS hi a system a la felfai tawk loh avangin sawrkar hnathawkte huam tir rih lo turin sawrkar ngen leh nise. A system siamfel a nih hma chu sawrkar hnathawkte hlawh pawh deduct rih lo turin sawrkar ngen nise.

(iii) Sawrkar hnathawkte phalna la hmasa lova kan hlawh cut tum chungchang hi hruaitute'n ngaihtuahin a tul angin legal option explore ni rawh se.

3. He General Conference thurel hi ni 17.4.2025 khan ziakin Chief Minister hnenah kan thlen bakah appointment dil nghal a ni a. He lehkha siam lai hi chuan CM office lam atangin appointment hun pek kan la ni rih lo a ni.

4. Kan hriat theuh angin sawrkar chuan kan ngenna ti hlawhtling lovin 1st April 2025 atanga MUHCS min hman luih tir in, kan hlawh deduct na tur head te thlengin a rawn siam ta a. 1st April 2025 atanga sawrkar hnathawkte harsatna tawh te leh sawrkar atanga thuchhuah thar engemaw zat siam ngai hian a system la inpeih lohzia a lantir a. Hetia system felfai lo chunga min luhpui avang hian damlo inenkawlna chungchanga harsatna tawk pawh kan awm chho ta mawlh mawlh reng a ni. Hetiang a nih tak avang hian FMGE&W OB te chuan Conference thutlukna angin legal option an explore mek a. Dan hre mi te min rawn angin naktuk hian kan thutlukna sawinawnna leh kan hlawh deduct lo tura ngenna Chief Minister hnenah lehkha thehluh leh tum a ni. Kan ngenna hi sawrkarin a tihlawhtling lo anih chua a tul angin Court kal tura in buatsaih a nie.

5. General Conference-a rorel palai kalkhawmte khan a hma lama tarlan dan bak hi hlawh cut chungchang emaw, family declaration siam leh siam loh chungchang emaw kan rel tel lo tih kan in hriattir a ni.

FMGE&W hmalak zel dan chu a tul angin kan la in hriattir zel dawn nia.