Theihtawpin sawhthing kan lei - TBC-a

ZPM chuan vawiin (5.5.2025) chhun khan an offic-ah chhung inkhawm an hmang a, thusawitu Adviser to CM TBC Lalvenchhunga, MLA chuan theihtawpin kuthnathawktute sawhthing an lei thu leh kalphung thar mipui sorkarin hun rei lote chhungin thil tha tam tak a tih tawh thu a sawi.

TBC Lalvenchhunga chuan ZPM-in sorkarna an chan hnuah ram tan thil tha tam tak an ti tawh tih sawiin, 'Chutih rualin kan thiltha tihte mipui hriata puanzar kawngah mahni in fak kan hreh hle niin a lang. Eptu party-te sawichhiatna kan sepui ruah tawrh leh ngawt ngawt mai thin thiul fuh ber niin ka hre lo a, mipuite hian kan thil tih thatte leh sorkar thar kan neih hnua kan hmasawnna leh hmalaknate hi an hriat a tul hle a ni,' a ti.

Anmahni puala budget an pharh ve hnuah khairual thei ang berin hmasawnna an kalpui tih sawiin Adviser to CM chuan, 'Opposition bial hrekna thinlung pu hauh loin budget kan hmang a ni tih hi mipuiten lo hria se ka duh hle. Kan ramah rorelna tha leh langtlang Sorkar a awm theih nan Chief Minister kaihhruai sorkar chuan thahnemngai taka hma lain, nikumah inrenchem kum kan puanga department hrang hrang atangin nuai 100 tel tak meuh kan hum thei,' tiin an pawisa hum chu tul dangah daihzai takin an hman mek thu a sawi.

TBC Lalvenchhunga sawi danin, tar pension, rualbanlote leh hmeithaite pension-te pawhin malsawmna thar an dawng mek a, wildlife worker-te,  sikul chaw chum bakah health care hnuaia nurse-te hlawh an tihpun leh hnathawktute hlawh duhsak taka an han pek thinte pawh hi sorkar thar danglamana kan hmuh mekte an ni.

Kalphung thar mipui sorkarchu khawsak harsa zawkte tana ding a ni a, ration man tihsan chungchangah pawh khawsak harsa zawkte tan buhfai man hi cheng khat pawhin an ti sang lo, sorkarin buhfai lei nan sum tam tak a sen thin hi a lo ziaawm theih nan khawsak awlsam zawkten heti zat hian i khul ve tawh ang u, tiin retailer-ten dik taka an buk theih nan an lawmman tihsan sak  an ni.

Tuialhthei man sorkarin a tihsan pawh mipuiin an pawm thiam em em a, a chhan chu a hmanna tur ruahmanna fel tak sorkarin a siam vek a ni. Tin kan lo sawi tawh ang ngeiin Electric leh tui Bill hi vawiin thlengin an la ti sang lo.

Kuthnathawktute thar chhuah sawhthing theih tawpin an lei tih sawiin Adviser to CM chuan, 'India ram puma sawhthing market rate tlahniam leh harsatna hrang hrang sorkarin a hmachhawn chungpawhin theihtawp a chhuah a, a beidawn san ve lo. Intiam zet a ti leh si lo te ai chuan harsana karah pawh theih tawp chhuaha thutiam bawhzuitute hi mipuiten an hria a ni,' a ti.