LADC sorkar thiah ngei phut

Lai Students' Association (LSA) General Headquarters chuan ni 2.5.2025 khan thuchhuah siamin, ni li chhunga 11th Lai Autonomous District Council (LADC)  sorkar thiat turin Governor an ngen nawn a, ni li chhunga thiahna order chhuah a nih loh chuan Lawmgtlai khawpui chhunga office-te khar tir an tum.

LSA thuchhuah : 

A hmasa in Lawngtlai District mipui zawng zawng, All NGO leh a bik takin zirlai zawng zawngte Lai Students' Association General Headquarters: Lawngtlai hming in chibai kan buk a che u. Kan LADC buai chungchang a kan Governor hnen a LSA General Headquarters in kan duhdan leh ngaihdan press conference kaltlang a kan puanzarte mipui lam atangin support nasa tak kan dawng tih kan hria a, lawmthu kan sawi tak meuh meuh a ni.

Kan hriat theuh angin 11th LADC chu kan aiawh atan a kan thlan lal ngei kan politician-te'n mipuite ngaihtuahna nei lek lovin mahni mimal hamthat duhluat vangin nasa takin a buai mek a, a ram leh hnam ang pawhin nasa takin kan mualpho mek ani. Sorkar mumal tak a awm theih loh avang in vawiin ni thleng in LADC chu budget pass thei loin a awm a, he budget pass theih loh avang hian LADC hnuai a sorkar hnathawkten an thla hnih hlawh (salary) la thei loin an awm mek a, harsatna nasa tak an tawk a ni tih kan hriatin LSA General Headquarters Lawngtlai chuan na a tihpuiin hriatthiam harsa a ti takzet a. Chuvang chuan mipui harsatna tawh mek hi LSA harsatna ah ngaiin en liam mai mai a tumlo a, nasa takin hma a la chhunzawm zel dawn ani. Lairam chhung a mipui zawng zawngte he kan hmalakna hi LAIRAM leh HNAM mualpho mek chhanhimna hna a ni tih hria a nasa taka support min pe chhunzawm turin kan ngen nghal bawk a che u.

District Council chung a thuneitu ber kan Governor zahawm tak, i hnenah press conference kaltlang in LSA General Headquarters: Lawngtlai chuan kan duhdan leh ngaihdan te kan rawn thlen tawh a, mahse vawiin ni thlengin I hnen atang eng thu mah kan la dawn loh avangin LSA General Headquarters: Lawngtlai chuan ngun takin a ngaihtuah nawn a hetiang hian I hnen ah kan duhdan leh ngennate kan rawn thlen leh e.

1. 11th LADC hi vawi 5 lai a buaina ni tawh a, political stability awm theih loh zia hrechiang bertu i ni a chuvang chuan a rang thei ang ber a suspension order ti chhuak turin kan ngen a che

2. 11th LADC ah hian eng party mah sorkar tir kan remti tih tawh lo.

3. Suspension order hi ni 4 ral hma a tih chhuah a nih loh chuan Lawngtlai khaw chhunga awm office zawng zawng tiamchian awm lo in khar tir a ni ang. Tin, a tul ang in na takin hmalak chhunzawm zel ani bawk ang.

4. Sorkar thar tha tak LADC a a awm theih nan a rang thei ang bera general election nei tur a hma min laksak turin kan ngen bawk a che.