Tui a pump theih loh

PHE Department chuan thuchhuah siamin, tun hnai ruahsur nasa avanga tuilian leh tuinu nasa lutuk avangin Aizawl khawpui chawmtu Greater Aizawl Water Supply Scheme (GAWSS) Phase - I & II te chu May 30, 2025 (Zirtawpni) ațanga vawii (June 3, 2025) thlengin tui pump theih a ni loa, power transformer lamțhat loh avangin GAWSS - III @Setlak hi May 26, 2025 (Thawhtanni) atangin tui pump theih a ni lo tih an tarlang.

PHE tarlan danin, chutih laiin Vaivakawn Zohnuai lei tlakhniamna hmunah GAWSS – III tui pump-na pipe atangin June 2, 2025 (Thawhtanni) khan nasa takin tui a lo chhuak a ni. Tui pump loh lai a nih avangin hetianga tui lo chhuak vak mai hi a chhan hriatthiam a harin helaia cheng mipuite an ralkhel hle tih hriat a ni a, department chuan pawi an ti hle.

Tin, May 30, 2025 (Zirtawpni) khan Zemabawk South (NH 54) kawngchhak lam inhmun laihna hmunah nasa takin lei a min a, he leimin hian a chhak tlang, Beraw Tlang panna kawng (Kacha Road) hrula kal Assam Rifles leh Lungbial mipuite tui pekna pipe line a hnawl chhia. Hemi a nih vangin tun thlengin tui supply theih a la ni lo a, pipe line siamțhat hna ngawrh taka thawh mek a ni.

Heng bakah hian, khuarel chhiatna hmun hrang hrangah thlengin hengte avang hian khawpui chhung tui semna (distribution line) lamah chhiatna nasa tak an tawk mek bawk a ni. Heng chhan hrang hrang avang hian khawpui chhungah tuisem mumal theih a ni lo. Khawchin leh tui dinhmun hrang hrangte thlirin pangngai taka tui sem leh theih hun tur hi chiang taka sawi theih a ni lo.

Mipuite hriatthiamna dilin PHE Department chuan, 'Ruahtui dahkhawl lamah tan lo la zel a, min țawiawm turin kan ngen tak meuh meuh a ni,' an ti.