Chhiat tawh karah YMA

Serchhip Sub-Hqrs. YMA hruaitute chuan tunhnaia ruahsur nasa avanga Serchhip-a chhiatna thlenna hmun henkhatte vawiin (3.6.2025)  hian tlawhin, tunhnai ruahsur nasa avanga vanduaina tawk zawng zawngte an tawrhpui thu an sawi a, chhawmdawlna hna thawktute zawng zawng chungah lawmthu an sawi.

Serchhip Sub-Hqrs. YMA hruaitute hian tunhnaia ruahsur nasa kaihhawiha Serchhip P&E Veng-a In chhia senghawi hnatlang te chu nimin khan tlawhin helai hmunah hian Serchhip P&E Veng khawtlang bakah Serchhip Kawnpui North Branch YMA leh Chhekhnai Branch YMA atangin mi 150 vel an thawkchhuak a, Serchhip Sub-Hqrs. YMA hruaitute hian hnatlang te thingpui lumna tur sum pein an hnathawhte an thlirpui a, chhiatna nasa tak a thleng chu pawi an tih thu sawiin, vanduaina tawk te chhawmdawlna atana P&E Veng mipuite mai bakah Veng dang aṭanga mi tlawm-ngai ṭhahnem tak an thawkchhuak chu lawmawm an tih thu an sawi bawk.

Serchhip Sub-Hqrs. YMA hruaitute hian Serchhip by-pass Road-a leimin avanga lirthei tangkhang mek te pawh a hmunah tlawhin kawngpui enkawltu ten leimin thenfai hna an thawh mek chu a hmunah an enfiah bawk. Kawngpui enkawltute chuan tluang taka hna an thawh thu leh harsatna dang a awm a nih loh chuan chawhnu dar 2:30-ah lirthei kal theih tura thenfai hman an inbeisei thu lo hrilhin, YMA hruaitute awm lai hian lirthei te hi chhuah tan a ni.

Serchhip Sub-Hqrs, YMA chuan leimin avanga mi tam tak ten harsatna tawka khualzin leh bungraw phur lirthei tam tak te an tangkhan laia Serchhip Kawnpui South Branch YMA, New Serchhip North Branch YMA leh Serchhip Darnam Branch YMA te bakah Serchhip Town pawn lama Branch ṭhenkhat ten chaw eitur leh riahna turte an lo buatsaih sak chu lawmawm an tih thu an sawi bawk a. |anpui ngaite ṭanpuitu ni zel turin YMA Member te chu an chah bawk a ni.

Tunhnaia ruahsur nasa avanga In chhia senghawi hna hi Vawiin hian P&E Veng-ah neih leh tur niin Serchhip Sub-Hqrs. YMA in ruahmanna a siam angin Serchhip Hmar Veng Branch leh New Serchhip Venglai Branch ten an pui ve leh anga. Nimin lama Dinthar Branch huamchhunga In ṭhiah tura ruahman chu ruahsur avanga ṭhiah theih a nih loh hnuah Vawiin hian ṭhiah leh tum a ni anga, Serchhip Kawnpui South, Serchhip Vengchung leh Serchhip Field Veng Branch ten hnatlangin an pui leh dawn bawk a ni.