Power supply dinhmun thlirho
admin 03-Jun-2025 04:59 PMTunhnaia ruahsur leh thlipui avang Mizoram hmun hrang hranga power supply pekna chhia siamthat hna thawh mekte dinhmun vawiin (3.6.2025) hian Power Minister F Rodingliana hoin department officer-ten a office-ah an thlirho.
He huna tarlan a nih danin, tun dinhmunah 33kV North Bukpui Sub Station tih lohah chuan sub-station zawng zawng atangin power an dawng kim tawh a, North Bukpui Sub-Station pekna line pawh check mek niin, reiloteah power pekchhuah theih beisei a ni. Khaw thenkhat power supply pekchhawnna feeder thenkhat line chhia awmte pawh a tahtawlin siamthat mek zel a ni.
Distribution transformer chhiate pawh thlak mek zel a ni a, vawiinah ringawt transformer 5 pekchhuah a ni. Aizawl khawpui bikah khaw chhia leh harsatna dang a awm loh chuan naktuk (June 4, 2025) hi chuan power pek kim theih beisei a ni.
Chawnpui Sub-Station atanga Aizawl West lama power pekna, a bikin Dinthar Veng, Tuikual leh Dawrpui Vengtharte chawmtu line, tunhnaia chhe zing bik chu tih ziaawmna turin a ranglama hmalak ni se tiin rel a ni. Hna hmasa ah feeder pumpui shutdown lak ngai lova a chhe lai te thliar hran zung zung theihna turin Line Gang vuah ni se tiin rel a ni bawk.
Hetihlai hian Union Power Minister-in Power Minister F Rodingliana hnena nikum August 5-a a lo tiam, Zuangtui leh Bukpui inkar 132 KV line load tam zawk keng thei HTLS conductor-a thlakna tur leh Mizoram chhung hmun hrang hrang a sub-station 7 (Bawktlang, Saitual, Melriat, Khawzawl, Champhai, Serchhip Bukpui, east Lungdar) transformer lian zawk dahna tur cheng vaibelchhe 47.87 chu DONER in an rawn sanction.
He project hi zawh a nih chuan Zuangtui leh Bukpui(Serchhip) in kar a 80MW chauh load la thei thin kha 200MW thleng load an la thei tawh dawn. Hei hi Saitual District, Khawzawl District, Champhai District leh Serchhip District-ten an tangkai pui hle dawn a ni.
