Zuangtui laka FIR hnuhkir phut

MNF Aizawl East-I Block chuan thuchhuah siamin,tun hnaia Aizawl East-I huam chhunga awm Hot Mix Plant Zuangtui a mi chu, khawtlang mipuiten an duh lohna an lan tir chungchangah, Zuangtui khawtlang tawrhna an hrethiam tih tarlangin, An thiam ang tawka hma an lo lakna ah tih sual palh an neih a lo awm chuan, sawrkar pawhin hrethiam a ngaidam turin kan ngen sak tak meuh meuh a ni,' an ti.

He Hot Mix Plant hi Polution Control Board pawhin a awmna hmun a dik loh dan te, khawpui area atanga km 1 ai a hnai lo leh sakhaw biakna hmun atanga km 0.5 ai a hnai lo ah tih te a ni, mahse he Hot Mix Plant hi khawpui chhungah leh  biak in kawt deuh chiah ah a awm nghe nghe nia tarlangin MNF Aizawl East-I Block chuan, 'Heng bakah hian, he khawlin Polution chhia a tih chhuah tam loh nana diesel hman tur tih a nih laiin, diesel ai a chhe zawk leh la refined loh crude oil an hmang leh zel te hi a dik lo. Chumi piah lamah a khu leh a rima chhuah tam loh nana a hnuaia tui awm reng tur chu tui dah a ni ngai lo,' tiin Zuangtui khawtlang pawhin pipe lei ula luikawr tui kan laksak ang che u te pawh ti thin mahse an ngaihsak ngai lo niin a tarlang.

MNF Aizawl East-I Block chuan lirthei neihtu mipuite lakah sawrkar hian polution certificate an strict em em lai a, a sawrkar zawkin sawrkar dan hre reng chunga a bawhchhe reng mai chu mipui min tham lohna a nih thu tarlangin, 'Mizoram Polution Control Board hian sum tam tak chawi tir ngei bawk rawh se. May 15, 2025 ral hma ngeiin, dan dik lova Hot Mix Plant khawl hman avanga harsatna thleng chungchangah, PWD-te hian an FIR theh luh hi an withdraw lo a nih chuan, Zuangtui a PWD Quality Control,  Rsearch and Development office staff te an office kal tur tiamchin awm lova dan an ni ang,' an ti.

Dan tam tak bawhchhe chunga Zuangtui khawtlang laka FIR an la thehlut ngam mak an tih thu tarlangin MNF Aizawl East-I Block chuan, 'Kan Home Minister pawhin an FIR thehluhte lo register tir lo tur  leh Polution Control Board-te dan an bawhchhiat chungchang ah dan anga thubuai lo siamsak zawk turin kan ngen a ni. Dan dik takin he khawl hi hman nise chu, Zuangtui khawtlang te hian an venga tanga sawn chhuah em em pawh an tum a ni ber lo,' tiin tu mitmei mah veng lova dan an bawhchhe lui tlat avanga he boruak hi thleng a ni tih hi Zoram mipuiten hriatsak turin an sawm.