Mizoram UPC arsi lian a liam ta

Mizoram UPC kohhranin an arsi lian ti hiana an chhal Rev. Vanlalfela Sailo (Rtd.), Chawlhhmun chu tukin (13.5.2025) dar 3:25 khan Ebenezer Hospital- ah a thi a, vawiin chhun khan an chenna inah vuiliam a ni.

Mizoram UPC hruaitute hnen atanga Bengvarna thudawn danin, Rev.Vanlalfela Sailo hian kum 1987-ah pastor hna a thawk tan a, kum 25 chhung pastor hna a chelh hnuah July 2012 July khan a pension. Pastor hna a thawh chhung hian bial 7 a vawng hman a, heng bakah hian chanvo pawimawh tak tak, General Superintendent, General Secretary, General SS Secretary (term 2) North Mizoram District Superintendent, Hmarthlang District Superintendent leh ATI Board Chairman nihnate a chelh.

Rev. Vanlalfela Sailo hi full time a rawngbawl hna a chelh hma hian, Mizoram Sawrkar hnuaiah home guard (kum 2),  Mizoram Armed Police (kum 15) a service hman a, award 15 a dawng. MAP atan lai hian a hna hi kalsanin UPC kohhranah full term-a rawngbawl turin pastor-ah a lut ta a ni.

Pastor atanga a pension hnu hian kohhran a rawngbawlna chu chhunzawm zelin, khawthlangah pawh a phak tawkah thahnem ngai takin ke a pen thin. Branch YMA Adviser, MUP hruaitu hnate a chelh thin a, an awmna veng Bethel Welfare ah hian a thih ni thlengin chairman hna a chelh bawk a ni.

BP sang leh zunthlum nei a ni a,  August 24, 2024  khan semi stroke a nei a ni tih hriat chhuah a ni. March 18, 2025  ah a taksaah na nei belh zelhin, March 20, 2025 khan Ebenezar Hospital-ah luh pui a ni. ICU ah dah luh niin, heta tang hian ICU leh HDU-ah sawn kual deuh reng a ni a, tukin khan a natna tuar chhuak zo loin chatuan ram a pan.