Thaidawr Tlang chungchang sawiho

MZP General Headquarters hruaitute chuan nimin (3.6.2025) khan K. Sapdanga, Home Minister-in leng tura a sawm angin, a pisaah an leng. Phuldungsei khua Thaidawr Tlang pan chhohna kawng sir a Tripura Sawrkarin guest house an rawn sak chungchang leh Tripura Sawrkar hmalak dan an sawiho. 

MZP chuan, Home Minister hnenah Phuldungsei khaw bula Thaidawr Tlang pawn chhohna turah Tripura Sawrkarin guest house cheng nuai 300 man an sak mek thu leh, Tripura State Rifle-te an duty reng thu leh Mizoram Police-te pawh duty nghal se an duh tih an hrilh.

Mizoram chhunga Tripura Sawrkarin buiding an sak mek, MZP-in a ngaimawh em avanga a hmuna an lo tlawh tawh thu sawi nawn lehin, tun hnaiah mi tu tih hriat loh ten an beih hnuah pawh sak chhunzawm an tum leh chu theihtawp a dodal turin Home Minister hi an ngen a ni. 

Home Minister chuan, MZP-ten ram leh hnam veia a mah an finchhuah thin leh theih ang anga hma an la thin chu lawmthu a lo hrilh a, 'MZP duhdan angin, Kawnpui M atangin Thaidawr Tlang pan chhohnaah Mizoram IR te dah phei a ni ang,' tiin hmalak mek a nih thu MZP hruaitute a lo hrilh.

Home Minister chuan, Tripura Tourism Minister nen an inbiak thu sawiin, guest house sak chu chhunzawm tawh lo tura hrilh thu a sawi a, official level-ah sawiho tura an ruahman thu a sawi bawk.

Home Minister chuan, Tripura State Rifle-ten Thaidawr tlang pan chhohna turah check gate an lo siam ve ngawt pawh thiat nghal tura an hrilh thu a sawi.

MZP-in Phuldungsei khawtlang hruaitute hnen atanga thu a dawn danin, check gate chu thiah nghal a ni. 

MZP chuan, Home Minister hi a hmalakna avangin lawmthu an hrilh a, Jampui tlangdunga Mizo mipuite leh Mizoram khua leh tuite venghim tura theihtawp chhuah zel turin an ngen nghal.