Excise Minister-in camping centre a tlawh

Vawiin (4.6.2025) tlai khan Excise Minister Lalnghinglova Hmar chuan Synod Revival Camping Centre (SRCC), Sihphir Neihbawiha ruihhlo ngaite puala chhanchhuahna camping neih mek chu a tlawh a, camping buaipuitute nen an inkawm bakah camping kaihhnawih a tul apianga hman turin pawisa a hlan. 

Excise Minister Lalnghinglova Hmar chuan ruihhlo ngaite puala camping buatsaihtute hmalakna fakawm a tih thu sawiin,  'Ruihhlo do kawngah sawrkar leh khawtlangin theihtawp a chhuah chungin, kohhran a tel chuan lian zawk leh awmze nei zawkin hma a lak theih thin a ni. Tuna camping boruak atangin ruihhlo ngai chhanchhuah kan mamawh zia a lang chiang hle,' tiin kohhran pawhin thildang thlauhthla chuang loin helam hawi telh telh se a duh thu a sawi.

Rev. JC Lalramliana, Synod Revival Committee Director, Rev. F. Lalrinnunga, Synod Revival Committee member leh Upa Lalmuana, Camp Director te’n Excise Minister hi an lo dawngsawng .

Camper te chu an chhuahna tur zawnsak vek tum a nih thu leh, an chhuah hnuah pawh inlama tlawh chhuah vek tum a nih thu an sawi a ni. Karleh Thawhlehni atangin follow up camping neih tum a nih thu an sawi bawk. 

Chhanchhuahna camping-ah hian camper tam laiin mi 1005 an tling a. Synod Revival Camping Centre-ah hian tun dinhmunah mi 120 awm mekin, camper-te hi kum 18 leh 67 inkar te an ni.

May 5, 2025 khan lutin Ningani, June 5, 2025 hian an chhuak ang. SRCC bakah hian Youth Recreation Centre, Falkland-ah Chhanchhuahna camping hi kalpui niin mi 112 an awm mek bawk a ni. Camping buatsaihna’n cheng nuai 40 vel sen tawh a ni.