Zirtirtu transfer order cancel

Tlabung Joint VC leh NGO chuan thuchhuah siamin, Govt Tlabung High School zirtirtu transfer order chu an phut angin sorkarin an cancel tak thu an tarlang.

Tarlan tawh angin, Tlabung Joint VC leh NGO hian zirtirtu transfer order cancel phut hian ni 6.6.2025 atang khan Govt Tlabung High School-a sikul kai turte an dan bakah zirtirtu transfer tak hian an khua a chhuahsan lohna atan an dang a ni.

Tlabung VC leh NGO thuchhuah : 

Govt Tlabung High School zirtirtu, Esther Lalhlupuii, Lungtian High school-a sawn (transfer) tura tih anih chungchangah Joint VC & All NGOs Tlabungte'n lungawilohna lantirin, transfer order cancel tûrin kan sorkar lakah thuchhuahte siamin, khawtlâng mipui kalkhawm te'n 'resolution' point engemaw zat kan lo passed tawh.

Tin, zirtirtute leh zirlaite'n an zirna in chhûng pawh dai lût thei loa June ni 6 - 9, 2025 thleng kan dan beh hnuah kan sorkar lakah beiseina leh rinna sâng tak nei chunga kan ngaihchân leh innghahna chuan awmzia alo nei ta a, kan ngen leh beisei ang takin Gov't Tlabung High School zirtirtu Esther Lalhlupuii Transfer order chu cancel a ni tih vawiin 10/6/2025 (Thawhlehni) hian sorkar zahawm tak thuchhuah aṭangin kan lo hre ta hi, keini Jt VC leh All NGOs Tlabung te chu kan lawm takzetin, kan sorkar hnênah, a bik takin kan education Minister Dr. Vanlalthlana leh School Education Director Angela Zothanpuii-te chungah thinlung takin lawmthu kan sawi a ni.