Charity concert-a sum lut hriat tawh

LPS Vision Production leh Youth Icon 2024 Top 10 te tangkawpin khuarel chhiatna tuarte tanpuina tura June  7, 2025 zana charity concert an buatsaihah mipui sum thawhkhawm cheng nuai 6 hmuh chhuah a ni.

Charity Concert hi June ni 7, inrinni zan khan LPS Studio ah neih a ni a, TV leh Yotube-ahte concert hi live-a pek chhuah a ni a, Youth Icon ten zaia mipui an awih, hun an hman chhungin veh bur khawn a ni a, chuta sum tlingkhawmte chu chhiar fel a ni tawh a, mipuiin sum thawh tlingkhawm chu cheng nuai 6 a tling a ni.

LPS atanga thudawn danin, charity concert neih chhung hian khuarel chhiatna tuarte tana sum thawh duh hi an thahnem hle a, hetihlai hian sum pek khawmna tura bank account an dahte chu a jam nasat avangin sum thawh duh pe thei ta lo an awm nual a ni.

LPS Vision Production leh Youth Icon 2024 Top 10 te chuan khuarel chhiatna tuarte tanpuina tur sum leh pai thawtute zawng zawng chuan lawmthu an sawi tak meuh meuh a ni. 

Charity concert an neih atanga dum an khawn chhuahte hi hun remchang hmasa berah Youth Icon top 10 ten an sem chhuak dawn a ni.