CYMA hruaitute'n Health Minister an kawm

Vawiin (11.07.2025) chhun khan Central YMA hruaituten Mizoram Universal Health Care Scheme ( MUHCS) chungchangah Health Minister Lalrinpuii an kawm. 

Central YMA Committee sang, Central Executive Committee ( CEC) in a lo rel tawh angin health care scheme chungchangah Mizoram Sawrkar leh Non- Government Hospital Association Mizoram ( NGHAM) te inrem lohna avanga mipuiin harsatna an tawh mekte thlirin hruaituten hma an la.

Vawiina inkawmnaah hian MUHCS chungchanga sawrkar ruahmannate  Health Minister hian a sawi a, NGHAM nena inkara thil hriat fiah loh awmte sawifiahin sawrkar chu biak theihin a inhawng reng a, mipuiin an tawrh lohna tura hma an lak mek thu a sawi.

Central YMA hruaitute hian mipuiin an tawrh zel lohna tura sawrkar leh private hospital neitute chu inhawng tak ve ve chunga sawiho zel tur leh mipui tana tha ber ngaihtuaha hma la turin an ngen. A tul a nih chuan Central YMA chu hma la tura a inhawn reng thu an sawi.

Central YMA hruaitute hian karhmasa Zirtawpni khan Private Hospital neitute, Non- Government Hospital Association Mizoram ( NGHAM) hruaitute an lo kawm tawh a ni. 

Vawiina Central YMA hruaituten Health Minister an kawmnaah hian Health Minister hi Health Secretary, Addl. Secretary Finance leh MUHCS CEO leh official dangten an tawiawm.