'Ng' awmna tur sawiho

Vawiin (18.7.2025) chhun khan Mizo Language Development Board (MDLB) Governing Body chu Directorate, School Education Department Committee Room an thukhawm a, 'Ng' awmna hmun tur chungchang an sawiho.

MLDB chuan Mizo “A, AW, B” (orthography)-a ‘Ng’ awmna hmun chungchang chu zau zawka Mizo “A, AW B” (orthography) zirchianna nei turin Grammar Committee ruat niin, thla 1 chhunga report board-a thehlut tura tih an ni.

Meeting chuan Mizo tawng 8th Schedule-a dah luh chungchang lo zir chiang turin mi 3 - Lalsangpuia, Secretary, MLDB – Convener, Dr. Zoramdinthara, HoD, Mizo Deptt.,MZU - Member leh Dr. H. Laldinmawia, HoD, Mizo Deptt. PUC – Member an ruat.

Dr. R. Zothanliana, Asst. Prof, Mizo Deptt. MZU chu Assistant Secretary, Grammar Committee atan ruat thar a ni.

Meetingah hian 2025-2026 Financial Year chhunga Board Budget Budget neih a bei tham em avangin tun dinhmunah board hmachhawp tihhlawhtlin theih vek a nih loh thu sawiho a ni.

Tarlan tawh angin, Mizoram Journalists’ Association leh Directorate of Information & Public Relations chuan June 23, 2025 khan IPR Auditorium-ah Media Workshop an buatsaih.

Workshop-ah hian Mizo Language Development Board Chairman chuan, Mizo ṭawnga hawrawp ‘NG’ awmna chu sawnin, ‘N’ leh ‘O’ inkarah awm tura ruahman a nih thu a sawi. NG awmna sawn ṭha an tih chhan ber chu, computer leh Excel velah Mizo hawrawp bik indawt dan a dik theih loh vang a nih thu a sawi bawk.