Tualthahna thleng chhui mek zel

Bawngkawn Police atanga Bengvarna thudawn danin, ni 16.7.2025) zana Vanlalhnuna (51) s/o Thangluaia (L), Bawngkawn Veng thah a nih chungchang chu chhui chian mek zel a ni.

Police-te chuan tualthahna hmuna awm Felix Lalthansanga (25), Vaivakawn leh Cindy Zoramchhani (21), Lengpui Vengthar nia inchhalte manin thubuai an siam sak a, jail-ah dahluh an ni tawh. Tualthahna thlenna hmuna awm, hemi zana man ve tho Lalawmpuia (24), Bawngkawn chu police-in an la kawl.

Lalawmpuia hi Vanlalhnuna inah hian kum 1 vel cheng tawh a nia, tualthahnaah a inhmamhnawih leh hnawih lo hriat chian a la ni loa, thubuai siam sak a ni dawn leh dawn loh pawh a la hriat loh. Thuzawhfiaha chhui chian mek a ni.

Tarlan tawh angin, Bawngkawn Branch YMA President hnen atanga an thudawn bawhzuiin Bawngkawn Police-te chuan thihna thlenna hmun hi an pan a, Vanlalhnuna hi a bedroom-ah thi a hmuh niin a khabe, a mit veilam leh a chalah hliam a tuar. Amah chauha cheng a ni.

Police-te chuan tualthahna hmuna awm Felix Lalthansanga (25), Vaivakawn leh Cindy Zoramchhani (21), Lengpui Vengthar nia inchhalte manin, thu an zawtfiah nghal.

Lalthansanga chuan a bialnu Cindy-i leh nunna chanta hi an lo awm dun hmuin, a thinrim thutin kut a thlak ta tih police a hrilh. Cindy-i chuan engmah a hriat loh thu a sawi thung a, zu/drugs a rui nia hriat a ni.