PWD Minister kan ring tawk - ZPM Thalai
admin 17-Jul-2025 04:24 PMZPM Thalai chuan tun hnaiah Mizoram chak lakna kawng ber National Highway (NH) 306 & 06 chungchangah thu dik lo thang tam tak a awm a ni tih tarlangin, 'Thu dik zawk ngaihven zel turin Mizoram mipuite kan chah duh. Kan PWD Minister hi kan ring tawk,' an ti.
ZPM Thalai tarlan danin, Ministry of Road Transport & Highway Minister Nitin Jairam Gadkari chuan 2023 khan Rajya Sabha unstarred question No. 748 a MP K Vanlalvena a chhannaah chuan Mizoram chak lakna kawng ber NH 306 & 06 hi MoRTH chuan 4-lane a siam a tum avangin package 8-ah a then a, package 1&2 hi Assam area niin, package 3,4,5,6,7 & 8 (Vairengte to Sairang) te hi NHIDCL Mizoram chan a nih thuin a chhang a ni.
Bilkhawthlir to Kolasib, Kawnpui to Khamrang kawngte hi PWD NH Division –III in a enkawl thin a, Mizoram Sawrkar chuan chak zawk a kawng siam a nih theih nan, May 28, 2025 khan Chief Minister Lalduhoma chuan MoRTH Minister chu meeting neihpuiin, MoRTH Office Memorandum C.No. 244614 chu June 24, 2025 khan chhuah niin, ppoint no. 4.2.2 Sanction of STMC Works on NH-54 ah chuan MoRTH chuan NHIDCL hnenah Vairengte to Sairang kawng hi a hmun a enfiah turin leh motor tlan thei tur a siam turin a hriattir a, he an hmalakna hi NHIDCL hian ni 15 chhung ngei a report pe leh turin MoRTH chuan a hriattir bawk a ni.
MoRTH thupek ang hian NHIDCL chuan Order chhuah atang a an deadline ni 15 (July 9, 2025) chhung ngeiin hma an la dawn a ni tih hriain BJP President leh Siaha AC Bialtu Dr. K Beichhua chuan 5th July 5, 2025 khan NH-06 hi a hmunah tlawhin, “kan dilnate ngaipawimawhin NHIDCL hian Monday (7th July) atang a hnathawk nghal turin hnathawhna hmanruate an chhawp nghal a” tiin thu dik tawk lo hmang a Mizoram mipuite a hrilh.
NHIDCL-ten Kawnpui (km 118) leh Khamrang (km 133) kawng siamna tur hmun hrang hrang a bungrua an chhawp chhuak hi Mizoram Chief Minnister leh PWD Minister Vanlalhlanate hmalakna a ni tih chiang takin Mizoram mipui hmaah an puan duhthu tarlangin, 'MoRTH Minister Shri.Nitin Jairam Gadkari leh Mizoram CM Pu Lalduhoma te meeting rah-chhuak a par ve lo tum tawh lo turin BJP President thar hi kan chah duh a ni. Kan PWD Minister Pu Vanlalhlana hi kan ring tawk,' an ti.
