Ruihhlo ngai pungkhawm tihtawp tum

Vawiin (17.7.2025) chawhnu dar 2:00 khan Excise & Narcotics Minister Lalnghinglova Hmar hoin Excise & Narcotics Department hotute leh Vaivakawn Siamtha Pawl hotute an thukhawm a, Vaivakawn veng chhunga ruihhlo ngai pungkhawm nasa thin then thianghlim dan tur ruahmanna an siam. He huna tarlan a nih danin, Vaivakawn leh a chhehvela kalkhawm ruihhlo ngai zinga 80% chu chenna in nei, ruih duh vanga kalkhawm an ni.

Excise Minister chuan, "Kan ramah ruihhlo ngai an pung zel hi a pawi takzet a, chutiang miten Vaivakawn, Rangvamual leh a chhehvel awm khawmna hmunpuia an hmanga, Mizoram hmun hrang hrang aṭanga ruihhlo tlan tura an kal khawm hi a veiawm takzet a ni. Khawtlang nen ṭang rualin 'A Senchi Lane' tia an sawi pawh tihrem a ni tawh a, khawtlang nen ṭang rual bawkin ruihhlo ngaite hmunpuia an hman ṭhin hi tihrem kan tum tur a ni," a ti a, Vaivakawn Siamṭha Pawl leh khawtlang mipuite nen ṭanho zel a duh thu a sawi.

Vaivakawn Siamtha Pawl report danin, Aizawl veng hrang hrang bakah khaw dang atanga ruihhlo ngaite’n Vaivakawn an pan khawm thin. An punkhawm tam lai chuan mi 200 chuang tling thinin khawlai hmun ualau tak taka inchiute an awm fo avangin nunau tan a him loa, rûkruk leh inrawk pungin biak in, anganwadi, YMA Property House bakah mimal in eng emaw zat rawk a ni tawh. Pawl hrang hrangin eitur an pe thin chuan ruihhlo ngai pungkhawm a tih tam phah a, eitur pe tur chuan hriattir hmasa thin turin VSP chuan thuchhuah an siam 

Excise & Narcotics Commissioner Z. Lalhmangaiha sawi danin, zirchianna an buatsaihah ruihhlo ngai zinga 80% vel chu mahni chenna in nei, mahse ruih duh vanga Vaivakawn leh a chhehvela kalkhawm an ni. Kalkhawm thin zingah hian TBCC atanga chhuak chu 60% vel an ni a, Hulhliap Project atanga chhuak chu 5% vel niin a bak chu hmun dang atanga kalkhawm an ni. Department lamin theihtawp an chhuah a, tlaivar in Aizawl khawpui chhungah mobile duty an neih thin.

Vawiin thukhawm chuan ruihhlo ngaite leh zu in miten an veng chu kalkhawmna leh riahkhawmna tura an ngai a, an pungkhawm thin chu tha an ti lova, nunau leh khawtlang tana a him loh avangin titawp tura thian thianghlim turin Excise & Narctics Department leh Vaivakawn Siamtha Pawl te chu thawhho nise tiin an rel. Hmalakna hmasa atan Excise Minister chuan VSP hnenah Rs. 20,000 a pe.