Heroin fir tha chi thahnem tak an man

Mizoram Police chuan vawiin (18.7.2025) hian thuchhuah siamin, July 10, 2025 zan khan Zokhawthar Police Station-te chuan an thu dawn bawhzuiin Zokhawthar chhehvelah foot patrolling an nei a, zan 8:00 velah satha ip hring, ruihhlo dahna ni ngeia hriat chu Kudamsen Kai, Zokhawtharah an chhar tih an tarlang.

Police tarlan danin, hnu lawkah satha ip hring an chharna bulhnaiah mi pakhat -Lalnuntluanga (20) s/o Lalpekliana, Khawmawi Village, Myanmar, Kudamsen, Zokhawthar a cheng mek nia inchhal chu man niin, satha ip hi Khawmawi, Myanmar atanga a ken leh helai hmuna a dah ngei a nih thu a inpuang a ni.

Hemi hnu hian thuhretu civil mi pahnih hriatpuinain satha ip hi hawn a ni a, a chhungah hian heroin ni ngeia hriat, inchis 8-a sei, inchis 5-a hlai, inchis 1-a chhah tum 20 (20 bricks) hmuh chhuah a ni ta a ni. Heng ruihhlote hi sarang leh aluminium foil hmanga uluk taka tuam a ni a, a tuamna aluminium foil-ah hian "DOUBLE UOGLOBE BRAND", “雙獅地球標” tia hriat bawk chuangin, "一帆風順” (Tluang takin kal nang che) tih a chuang tel bawk a ni.

"Double UOGlobe" hming hi Asia-Pacific ruihhlo tawlh rukna kawngah a mikhual lo hle a, heroin fir ber chi (99.9%) siam leh tawlh kawnga hriat lar an ni. 

Heroin hi a belhkhawmin kgs 7.422 niin, ₹ 2,22,66,000 (cheng vaibelchhe 2.22) nia chhut a ni. An mi man inpuanna atangin rang taka chhui chhunzawm a ni a, he thila inhnamhnawih midang pathum chu man belh leh an ni. Chungte chu - 

1. Lalhriatliana (28), s/o Malsawma, Tahan ‘C’ Group, Zokhawthar a cheng mek.

2. Chunglianawia (37), s/o Funglinga (L), Khampat, Myanmar, Zokhawthar a cheng mek.

3. Tialvangi (44), d/o Khuahluma, Neuva Section, Zokhawthar.

Hemi hnu hian an inpuanna atangin leh CID(SB) te puihnain Keifang, Saitual District-ah midang pakhat H.Lalrinsanga (49) s/o Lalremmawia(L) Aizawl Venglai nia inchhal chu man belh leh a ni.

Tun tuma Champhai Police-te heroin man hi Mizoram Police-in tum khata heroin fir tha chi a man zinga tam ber, fir ber leh hlutna sang ber nia chhut a ni.