Polytechnic Principal-in FIR thehlut

Mizoram Polytechnic, Lunglei Principal Lalnuntluanga chuan nimin (19.7.2025) khan an college building awmna ram kaihhnawihah Lunglei Police Station-ah FIR a thehlut a, ni 31.08.2018-a periodic patta renew dilnaah kum 1979-a thi tawh hming sign a la awm thu a tarlang. 

Lalnuntluanga chuan FIR a thehluhah hian Sport-a of Theiriat hi ni 08.04.1979 ah a thi a, hetihlai hian a fapa Vanlaldawngliana chu kum khat chauh a la nih avangin a pa thi tawh legal heir-ah puan (declared) a nih thu tarlangin, 'Naupang mai ala nih avangin Sport-a nupui K. Rosangi chu legal guardian-ah ruat a ni. Heirship certificate-ah khian Sport-a, chutih laiin a fapa Vanlaldawngliana khian periodic patta no. 230 of 1976 H Sport-a hminga awm hi heirship certificate ka nei a, ka ta tiin Mizoram Sawrkar chu a ram chhung luah angin court-ah min khing. He periodic patta ni 22.07.1976 ah issue a ni a, an renew dan P.Patta a inziak dan chu hetiang a ni,' a ti. A hnuaia tarlan ang hi.

10(ten) yrs w.e.f 22.7.1976 to 31.12.85-99-2014.

Calendar year zela kum sawm pek a nih dawn chuan 1985 hnu lamah hetiang hi an renew dan tur niin a lang a:

1. 01.01.1986-31.12.1999-14 years

2. 01.01.2000 - 31.12. 2014-15 years

Mizoram State Revenue Act 2013 hnu lamah kum 5(nga) chauh dam tawh tura tih a nih a rinawm a, chuti a nih chuan hetiang hi a renew dan tur ni a rin theih a ni:

1. 01.01.2015 - 31.12.2019-5 years

2. 01.01.2020-31.12.2024-5 years

3. 01.01.2025-31.12.2029.

Ni 31.08.2018 a p.patta renew dilnaah hian kum 1979 a thi tawh si khan hming ala sign tlat mai tih tarlangin Mizoram Polytechnic Principal chuan, 'Chuvang chuan H.Sport-a thih hnuah hian renew char char niin a lang a, chutah chuan kum 1986 atangin an renew apiangin forge signature an siam zel tihna a ni. Sport-a leh H Sport-a hi mi pakhat an nih leh nih loh min tihchian sak tur leh forge signature siamtuah hian kan rinhlelh ber chu Vanlaldawngliana, Theiriat a ni a, midang pawh an tel thei tho,' tiin thil tisualtu hi zawn chhuah saka, thil ti sualtu chu dan anga hrem a nih theih nan arang lama hma min laksak turin a ngen.

Tarlan tawh thin angin, Mizoram Polytechnic, Lunglei building awmna ram luah man pe turin court chuan Mizoram Sawrkar a hriattir a, pek a nih loh avangin court thupekin building eng emaw zat kalh a ni. Heivang hian Mizoram Polytechnic, Lunglei hian class an kal mumal thei lo.