Sorkar hna lakah kan fimkhur - Duhoma

Vawiin (25.8.2025) chhun khan Government Aizawl College (GAC) chuan an college kum 50 tlin lawmna, Foundation Day chu an college campus, Mualpuiah an hmanga, Chief Minister Lalduhawma'n hmanpuiin, asst. professor qualify lo eng emaw zat an awm thu leh sorkae hna lakah an fimkur thu a sawi.

Zirna sang zawk atana sorkar hmachhawpte sawiin Chief Minister chuan, 'Mizoram State University din tumin hma kan la. Kum 2036 hmaa lo neih fel hman kan tum. administrative building hi Luangmuala sak kan tum. A bul lo tantu tur thawktu pawh kan la thuaiin a rinawm. Mizoram Engineering College, Lunglei Pukpuia mi saw a taka function-tir kan tum. Kum 2026 Academic Year atanga zirna tan tumin thawktu thar mi 63 kan la dawn a ni. A hmunhma thawm that nan tun hnai khan cheng nuai 2541.19 kan sanction,' a ti.

Lalduhoma chuan college-a thawktu assistant professor qualify lo eng emaw zat lak an lo nih thu sawiin, 'Qualify vek turin sorkar hian vawi tam tak chance a pe tawh chungin la qualify lo 31 vel an la awm. Tunah hian an zinga 10 vel hi Court-ah an kal,' tiin court thutlukna an ngaihchan mek thu a sawi.

Chief Minister chuan sorkar hna lak thuah an fimkhur thu pawh tarlangin, 'Tun hnaiah NHM hnuaia hnathawktu pawl pakhat chuan sorkar hna lak thar turah an tana reservation siam turin sorkar an ngen. Nimahsela, lak an nih dan kan han zirchian khan India Danpui kalha lak an lo ni a. Keinin lo dah nghet ta ila, miin Court-ah min khing se, kan tla sa a ni. Lainatin duhsak em em mah ila an dilnate chu kan ‘Aw’ ngam ta lo a ni. Tun hnaia Mizoram Police Constable 259 kan lak thar takte kha, a buaipuitu police officers ho chuan 'Mizorama police lak tawh zawng zawngah a la fair ber' an ti ngat a ni,' a ti.