Electric bill tihsan a ni dawn lo

Mizoram leh Manipur electric bill bithliahtu Joint Electricity Regulatory Commissio (JERC) for Mizoram & Manipur chuan kum 2023-2024 atan electric bill tihsan loh turin thutlukna a siam.

JERC hian kumtin electric bill hi a ennawn thin a ni. Kum 2023-2024 atan hian Mizoram Sorkar chuan electric bill hi 3.15% a tihsan a rawt a, mahse JERC chuan dodaltute thu leh technical thil hrang hrangte a zirchian hnuah electric bill tisang lo turin thutlukna a siam a ni.

JERC atanga thudawn danin, Mizoram Power & Electricity Dept. chuan kum 2023-24 chhunga power supply enkawl nana revenue sum mamawh (ARR) cheng vbc. 782.33 bituk sak turin JERC an dil a, hemi hmuchhuak turin tuna tariff (electric bill) hman lai hi 3.15%-a tih sana, sum mamawh tlin phak lohna awm chu Mizoram Sorkarin subsidy cheng vbc. 157.90 emaw JERC-in ARR a bituk sak atanga 20.50% emaw, heta a tlem zawk zawk hian a phuhruk sak dawn tih an sawi. 

An dil ang chuan eng chhit man thar tur hi chawhrualin unit khat man Rs. 8.08 vel tur a ni. JERC hian P&E Deptt sum mamawhnate a zir chian hnuin ARR atan cheng vbc.567.77 a bituk sak a, hei hi kawlphetha hralhna atanga hmuhchuah tur a ni. 

JERC chhut danin tuna tariff kan hmanlai hmangin leh Electric Vehicle (EV) Charging Station atana rate thar rawtna atangin kum 2023-24 hian cheng vbc. 406.85 leh kawlphetha hman bang ram pawna hralhna atangin cheng vbc. 62.62 Cr an hmuh theih beisei a ni a, hei hi avaiin cheng vbc. 469.47 a ni. Hei hian Rs.98.30 Cr (i.e, 567.77–469.47=98.30)-in ARR a phuhru zo lova, tariff tih sana, tariff sanna atangin phuhruk tur a ni. 

Nimahsela, hei hi sorkarin cheng vbc. 98.30 subsidy pe-in a phuhruk sak theih dawn avangin tariff tih san a tul lo a, tariff hman lai leh category thar (EV Charging Station) atana hman tur rate an rawt hi kum 2023-24 atan hmang turin JERC-in thutlukna a siam a ni.