MLA inthlan vangin hun hmain LPS Comedian Search

Mizorama TV live show hlun ber tia sawi ngam LPS Comedian Search chu kumin hian MLA inthlanpui awm dawn avangin a buatsaih thin hun ai hmain neih tan a ni dawn a. Kum dang aiin intihsiakna hmachhawn tur an tam dawn bakah, kumin hian judge hmel thar kan hmu dawn.

Kumin LPS Comedian Search chu a season ang zawng chuan season 15-na tur a ni a, chumi awmzia chu kum 15 buatsaihna tur chiah tihna a ni. Covid-19 hri leng avanga kum khat a khaihlak zeuh tih loh chu kum zawn zata buatsaih thin a ni. Kumin bik hi kum tawpah MLA inthlanpui a awm dawn avangin, 'Ber' thlaa buatsaih thin kha August thla chhung hian neih a ni dawn.

LPS Comedian Search season 15-ah hian judge hmel thar kan hmu dawn a. Chu chu ziakmi Darrokima a ni. A ni bakah hian Chief organiser H Rotluanga a.k.a Mapuia leh Lalhruaitluanga Chawngte te an thu leh dawn a ni. Hei bakah, nikum lama intihsiakna zei tak maia kaihruaitu Lalrinpuii Kawlni pawhin 'host' hna a thawk leh dawn.

Mipui zing atangin judge hriat hlawh leh show tihmuhnawm em em tu Stephen Auhmun chungchang zawhna a tam hle. Hemi chungchangah chief organiser chuan, "Kan thianpa hi show neih zan apiangin min thutpui se kan duh a, mipui pawhin kan duh. Mahse, sorkar-a hna nei a ni a. Comedian search vang ringawta hna thulha chawlh lak hi thil mawi leh tihawm tak a ni lem lo a. Chuvangin, show neih zan apianga min thutpui thei lo hi kan hriattiampui hram hram a ngai a. Comedian Search-a a lo thut chang pawh a, a tuka hna thulh lo tura zan pawh riak lo a, Kolasib atanga Aizawl lehlanga rawn kal thin a ni," tiin Bengvarna a hrilh.

Judge thar chungchangah, 'Darrokima hi tun tumah hian min telpui turin kan sawm a. A ni hi college kallai atang tawha inhria, lo ding ho reng tawh thin kan ni a. Kan sawmna min pawmsaka kan lawm khawp mai,' a ti.

Darrokima hi inhmelhriat chawp tir ngai a ni lem lo. Chutih laiin, Comedian Search judge thutnaah kan la hmuh tam lo a. A hmaa lo thu tawhte hmingthat leh show an tihhlut theihna ang theihna kha phawkchhuak zo dawn em tih te chu mipuite hriat chak em em a ni. A lakak mipui beiseina pawh a sang dawn a, hei vang hian pressure pawh a sang viau thei bawk.

Kumin hian LH Thanga Enterprise in an sponsor dawn avangin, LHTE LPS Comedian Search season 15 tih a ni duah dawn a. August 18, 2023 khian intihsiakna tak neih tan tura ruahman a ni. Chawlhkar kalta tawp khan LHTE LPS Comedian Search season 15 chu he show-a pakhatna lo ni tawh te leh sawm bik mi tlemte te nen khuhhawnna neih a ni tawh. Hemi tum hian judge thar hmel kheuh hawn a ni!

A khuhhawnaah an show neih tur chungchang sawiin chief organiser chuan Zoram mipuiin fiamthu thawh thiam (comedian) te fiamthu hi an hlimpui tawh thin tih sawiin, "Keini a kara kan thiltih, chhungkaw thenkhatin an lo enkhawm a, chhungkuaa an lo nui ho dar dar thin thu te kan hriat hian ropui kan ti a, keini ngei pawhin nuam kan ti, kan sawi chhuak lo phal lo a ni. Kum hmasa lamah pawh nupa intithiam lo, inthen mai pawh duha awm hmanin, kan show min ngaihhlut saka min lo thlir sak hnuah an nupain an nui dun leh thei a. An nupaa inhau leh tur hi an inhauh leh tawh loh phah tih thute Whatsapp group ah ngei an rawn sawi ka'n hmu chu, a ropui kan ti a. Kan fiamthu hlimna'na lo hmang an awm tyih kan hriat hian, tling lo leh thiam lo inti tak chung hian lawmthu kan sawi a ni," a ti.

LPS Comedian Search-a champion lai chu Lalremsanga kha a ni.

LHTE LPS COMEDIAN SEARCH season 15 lawmman:

PAKHATNA : Rs 1,00,000

Suzuki Acess 125

Television (TV)

1.6kW Solar Hybrid Power Backup System

Trophy

PAHNIHNA : Rs 50,000

Refrigerator

Solar Heater 200ltr per day

Trophy

PATHUMNA : Rs 30,000

Washing Machine

Solar Heater 100ltr per day

Trophy