Politics-ah harhtharna a thleng - ZPM Leader

ZPM Champhai North Block chuan vawiin (14.9.2023) hian Kahrawt Community Hall-ah conference an hmang a, an hun hmanpuitu ZPM Leader Lalduhoma chuan politics-ah hartharna a thleng mek niin a sawi.

Lalduhoma chuan kan ramah party pahnihin ro an in relchhawk char char tih sawiin, 'Ruling party hming a inthlak a, CM chair a thu a inthlak a ni mai a, a rorelna kalphung erawh chu a in ang reng a engmah a danglam chuang lo tih kan hmu reng. Chuvang chuan a kalphung thlakthleng a ngai a ni, system thar kan mamawh a ni tiin sorkar kalphung thar kan aupui. Party sorkar hlir mai kan hrawn hian kan society leh kan kohhran thlengin, kan thlarau nun thlengin a eichhe hle tawh a ni tih kan hriat avangin party sorkar vuiliama mipui sawrkar din tumin rei tak kan lo bei a, keipawh kum 39 he policy ka vahvaihpuina hi a lo ni ve tawh a ni,' a ti.

ZPM Leader chuan a hrang tetea an beih avangin party pahnihte an hneh thei lo tih sawiin, 'Chuvangin heng party pahnih ni lo zawng hi chu a thei thei intelkhawm ila, kan chakna hi hmun khatah i dahkhawm teh ang tiin mipui movement party kan din,' tiin Congress ni lo, MNF ni lo sorkar din turin an engkim an vuiliama hmun khatah an awm a ngaih thu a sawi.

Zoram mipuiah hian politics-a harhna a thleng mek tih sawiin Lalduhoma chuan, 'Chu thlifim chuan min nuai mek. Vawiinah chuan tapchhak titi zawng zawng kan en chuan, a vaiah pakhatna kan hauh vek. Hei hi kan party dangte dinhmun nise kan ngui ngawtin ka ring. Vawiina ZPM dinhmun hi tute emaw dinhmun nise chuan an thawm a rin hle tawh ka ring a, amaherawhchu, chu dinhmuna min dahtu chu chunglam hnathawh a ni tih hi kan inzirtir a, chapo lo turin uang lo turin kan hruaituten min zirtir reng. Hnehna kan chan niah pawh thawm bengchheng leh hriat ngaihnawm lo kan chhuah ve ngai lova, kan theihna ni lovin min thawhsaktu avang a ni tih hi kan chiang em em,' a ti.

ZPM Party thuchhuah tarlan danin, ZPM Leader hian July 15, 2023 hnu lama ZPM zawm thar mi 1,236 an party-ah a lawmlut.