Lunglei SP sawn an duh lo

Lunglei Town VDP Coordination Committee chuan nimin (26.11.2024) khan thuchhuah siamin, Lunglei District SP J Lalmuankima sawn an duh loh thu leh an tha ti chaktu a nih thu an tarlang. 

Lunglei VDP thuchhuah :

Mizoram sawrkarin Dt 26/11/2024 (Thawhlehni) ah notification tichhuakin, Lunglei Superintendent of Police atan Pu Shivam Siddharth IPS chu a ruat a. Lunglei District Superintendent of Police mawhphurhna chelh mek tu Pu J Lalmuankima MPS transfer a ni tur hi Lunglei Town VDP Co- ordination Committee chuan tha kan ti lo hle a. Mizoram sawrkar chu notification a chuah hi sut turin na takin kan ngen a ni.

Lunglei SP Pu J Lalmuankima MPS in rei lo te Lunglei SP mawhphurhna a chelh chhung hian, Lunglei khawpui leh a chhehvelah ruihhlo leh sualna hrang hrang do kawngah nasa takin hma kan la ho a. Lunglei Town VDP Co- ordination Committee chuan a kaihhruaina hnuaiah Joint Operation vawi engemawzah nei tawhin, ruihhlo leh a zuartute engemawzah kan man tawh a ni.

VDP tha tichakin, Lunglei khawpui leh a chhehvel veng leh khua engemawzah, VDP din ngai lohnaah pawh a hmalaknain VDP din tawh a ni a. Sawrkar phal loh thil leh sualna ven kawngah nasa takin hma kan la mek zel a ni.

Lunglei khawpui leh a chheh velah Sawrkar phal loh thil leh sualna do kawnga hmalakna tur hmachhawp thahnem tak kan neih mek laia, Sawrkarin amah thlaktu tur nia ngaih, Notification tichhuaka SP thar a ruat ta mai hi, VDP Co-ordination Lunglei chuan hriatthiam har kan ti.

Chuvangin, Lunglei Town VDP Co-ordination Committee chuan Pu Shivam Siddharth IPS, Siaha SP; a nupui Pi Navneet Mann IAS, Lunglei DC chu, Lunglei SP atana ruat a ni ta mai hi kan hrethiam lova. Mizoram Sawrkar chu notification a chhuah hi sut ngei turin kan phut tlat a ni.