Jail tang tlan chhuak zawng mek

Ni 18.12.2024-a Champhai District Jail atanga tlan chhuakte chuan an tlan chhuah theihna atan jail-a duty leh an tanpuite an hrai nia hriat a ni.

Prison Department atanga Bengvarna thudawn danin, jail-a duty-te sawi danin, tang tlan chhuak hmeichhe pahnihte hian an tlan chhuah hma zan hian thingpui an lum a, duty leh jail tang ten an in. An in hnu lawkah an muhil zui a, an tlan chhuah dawna an thawm pawh tumahin an hre lo. An harh thei lo. Tang tlab chhuakte hi zawn mek an ni.

Tarlan tawh angin ni 18.12.2024 zing dar 2 vel khan Champhai District Jail atangin hmeichhe pahnih an tlan chhuak a, Champhai Police Station-ah thubuai ziahluh niin, zawn mek an ni.

Champhai atanga thudawn danin Champhai District Jail atanga tlan chhuakte hi Vansuieni @ Suinunfeli (36), Tahan C, Myanmar leh Lalchhanmawii (44), Khawmawi, Myanmar-te an ni. Jail bang hungna rangva ti chhiain, an tlan chhuak nia hriat a ni.

Suinunfeli leh Lalchhanmawii hi heroin avanga man ve ve an ni a, an thubuai chinfel a la ni lo ve ve.

Lalchhanmawii hi November 30, 2023-a Central Womens Jail atangin a lo tlan chhuak tawh a, hun eng emaw chen hnuah Champhai Police-te chuan May 11, 2024 khan Champhai Jail Vengah an man leh a ni.

A tlan chhuah hmasak tuma an man dan chu, Champhai Police chuan heroin kaihhnawihah mi pali an man a, anni hian Lalchhanmawii hnen atanga an lak niin an sawi. Anni hnen atang hian police-te chuan Lalchhanmawii phone number hi hriain, an man theih phah ta a ni.