72nd NEC Plenary-ah CM-in thu a sawi

Nimin (22.12.2024) khan Pragna Bhawan, Agartala, Tripura-ah NEC Plenary Session vawi 72 na, Union Home Minister Amit Shah kaihhruaia neih a ni a, Chief Minister Lalduhoma'n NEC kal zelna tur leh India hmarchhak bial hmasawnna tur thil pawimawh tak takte a thlen.

Chief Minister chuan, Viksit Bharat 2047 tihhlawhtlin nan leh DoNER Ministry hmalakna tihlawhtling zual turin Mizoram Sawrkar chuan world class infrastructure nena thuam industrial zone din an duh tih sawiin, 'Entreprenuer lamah sang tak thlen tumin Bana Kaih Scheme kan tlangzarh tawh a, dilna pawh sing chuang a lut tawh a ni. Kum rei loteah sustainable development goals leh employment siam belh lamah kan than chhoh ngei kan ring,' a ti.

Tunhnaia Central Sawrkarin NEC leh DoNER Ministry budget a tihpun vang te, DoNER Minister Jyotiraditya M. Scindia-in kawng engkimah phur tak leh inhawng taka a thawhpui vang tein Lalduhoma chuan lawmthu a sawi a, 'Prime Minister Narendra Modi-an 'hmarchhak bialte hi India ram economic powerhouse ni thei khawp hiala theihna (potential) nei an ni' tia a lo sawi tawh angin hmarchhak bialah hmasawnna chak taka kalpui turin remna leh muanna boruak tha tak siam a ngai a, theihtawp i chhuah ang u,' tiin kalkhawmte a sawm.

Chief Minister chu NEC chu chak lehzuala a kal theih nan full fledge secretary ruat fel thuai ni se, power sector leh IFC & WSM lamah NEC hi thunei zawkin awm leh se tia rawtna siamin, 'AMRUT-2 fund hi tam zawk leh khawpui lam tuilakna thawh nana hman theihin awm se, normative budget allocation a state chanvo hi tihsan ni se. DoNER Ministry kal tlanga project thehluh te kalkawng thui leh rei lutuk hi awlsam zawka kalpui dan dap ni se, 10% GBS hi awmze nei leh tam zawk kan hman theih nan DoNER hian Finance Ministry nena hma lain state sum indaih lohna laia project lian leh rotling thawh nana hman turin ruahman se. Kan mipui tam ber te innghahna agriculture lama hma kan sawn theih nan Ministry of Jal Shakti hnuaia Command Area Development Programme funding pattern hi 50:50 ni lovin 90:10 ni thei se,' a ti.