Mi vit hlumtua puh jail-ah

C. Lalramthanga (35) s/o Hrangkhuma, Armed Veng South vithlumtua puh Lalrinnunga (27), Mission Veng chu nizan (2.2.2025) khan Central Jail-ah dah a ni. 

Police atanga Bengvarna thudawn danin, Lalrinnunga hi mi vih thubuaiah an kawl lai a ni a, a mi vih nizanah a thih tak avangin fimkhur thilah nizan vek khan Central Jail-ah dah luh nghal a ni. 

Mitthi Lalramthanga hi a ute pahnih tlangval ve vete nen in khatah an cheng a, January 28 zan khan Elizabeth-i, Mission Venga cheng mek chu an inah a leng a, zan dar 10 velah an inhnial buai tan. Elizabeth-i hian Lalrinnunga (27) hi phone-a biain a pun a ni.

Lalrinnunga hian zan dar 10:30 velah C Lalramthanga te in a thleng a, an insual buai zui  Lalrinnunga hian C. Lalramthanga chu chemtein a vit nia sawi a ni a; C. Lalramthanga ú mipa pakhat chu a bân leh a mal velah a vit thung. An thâwmah thenawmte an tlan khawm a, Lalrinnunga chu an man a, kut pawh an thlak nual nia sawi a ni.

C. Lalramthanga hi a dulah vih a nih avangin damdawi in panpui nghal a ni a, a hnuah ZMC-ah ICU-ah enkawl a ni. A ríl hmun 8-ah a pawp a, a pumpui pawh a pawp niin an sawi a; a hliam tuar loin nizan 8:50 khan a thi. 

Lalrinnunga hi an intihbuai zanah police hnenah hlan nghal ni a, C. Lalramthanga a vihna chu chemte ni loin, tile keh them niin a sawi. Mahse, hliam hmuamhma enin chemtea vihna ni ngeia a lan thu sawi a ni.