Icon top 10 concert zaninah

LPS Youth Icon top 10 ten an huhoa an lanna tur ruihhlo dona hla music video an siam chu zanin (23.9.2025) dar 8-ah an tlangzarh dawn ta a, concert an nei chhunzawm nghal ang.

Zanin dar 8-ah Dawrpui Multipurpose Hall-ah music video tlangzarhna hun leh concert turin Youth Icon top 10 te  ngawrh takin an inbuatsaih zel a, concert ticket hi vawiin tlai dar 3 atangin Dawrpui Multipurpose Hall kawtah lei theihin a awm tan dawn.

Icon star-te hian an fan-te pualin an hla sak ngai lohte sak an tum a; a huhoa zai turin an in ruahman.

Icon star-te chuan an zai ngainatu, anmahni duhsaka hmangaihtu, an fan-te chu an concert hi chhim theuh turin an sawm. An fans zinga mi naupang kum 10 hnuai lam leh vohbikte'n concert hi an chhim duh a nih chuan a thlawnin luh tir an tum a, hetah hian anmahni hruaitute mi pakhat pawh free an ni dawn a, midang kalpui tu dang erawhin ticket an lei a ngai thung ang.

Youth Icon top 10 concert ah hian ticket man to bik siam a ni dawn lo a, Rs. 200 in hrut rual a ni. A kal hmasa apiangte chu a hma lamah an thu thei mai dawn a ni.

Youth Icon top 10 te hian a huhoa an lanna turin ruihhlo dona hla music video an siam, video hi tunlaia music video siamtu hriat tlawh Osiama kut chhuak a ni dawn a, an hla hi hlaphuah thiam C. Awma phuah a ni.