Mahindra BE 6 leh XEV 9e a tlangzarh

Mizoram Traffic Senior SP Ruatsanga Ralte chuan Mizorama a la hriat ngai loh hun ropui bik a ni tih sawiin, vawiinah Mana Motors showroom, Bawngkawnah Mahindra SUV electric car chi hnih - BE 6 leh XEV 9e a tlangzarh.

Ruatsanga chuan khawvel huap pawha zahpuiawm loh leh India rama car ropui tak an tlangzarhna phenah Mizorama Mahindra full range dealer Mana Motors neitute thawhrimna fakin ngaihsanawm a tih thu a sawi a, car thar pahnih BE 6 leh XEV 9e chu a leitute tan malsawmna tam tak thlengtu a nih theih nan leh Mana Motors hnenah duhsakna a hlan a ni.

Mana Motors-in Mizorama electric car an tlangzarh hmasak ber a ni a, BE 6 man tlawm ber Rs 20,84,339 a nih lain a to ber Rs 30,11,431-in a lei theih a, XEV 9e man tlawm ber Rs 23,95,622 a nih lain a to ber Rs 33,82,926-in a lei theih a ni.

Mana Motors Dealer Principal Dr Franklin Lalrinngheta chuan a hun tawn tawhah ropui bik a nih thu a sawi a, khawvel huap car intlansiak Formula E-ah Mahindra a inseng nasa a, a rah chhuah lo lanna chu tuna SUV electric car pahnih hi nia a hriat thu sawiin, 'Mipui duh dan khalh nuam, nalh leh chak cho phak tura duan a ni,' a ti.

Kumin March atangin Mahindra-in India ramah electric car pahnih hi a hralh chhuak a, tun thla tir khan thla nga chhungin 20,000 an hralh tawh tih tar langin tun dinhmunah thla khatah 8,000 an siam chhuak a, March 2026 atangin thla khatah 12,000 siam chhuah tumin ruahmanna an nei mek.

India rama passenger car hralh chhuah hnem kawngah Mahindra hi kum kal ta thlengin palina a ni thin a, kumin chhovah hma an sawn hle a, pahnihnaah inhlangkaiin electric car siam kawngah fak an hlawh leh zual.

Info Car hotupa Vanlalmuana chuan BE 6 leh XEV 9e chu a pianhmang inang lo deuh mah se a khawl pawimawh hrang hrangah inang a tam a, electric super car niin India rama car chak ber pawl a nih thu a sawi.

Battery chi hnih a hmang ve ve a, ARAI-in a pawmpui danin 79 kWh hmang BE 6-in km 682 a tlan thei a, 59 kWh hmangah km 557 a tlan thei ve thung. XEV 9e-ah 79 kWh battery-in km 659 leh 59 kWh-in km 542 a tlan thei a. Mizoram kawng chhuk chho leh zimah km 400 vel tlan thei tura beisei a ni.

Petrol emaw diesel emaw hmang, internal combustion engine car nena khaikhinin Mahindra SUV electric car pahnih hi a chak hle. Second 6.7-ah darkar khata km 100-a chakin a tlan hmang a, a chak thei ang berin darkar khatah km 200 a tlan thei a, 282 bhp leh 380 Nm torque a pe chhuak thei a ni.

Vanlalmuana chuan, 'Kawng engkimah changkang taka siam a ni a, steering tha bik hmangin kawng awm dan a zirin a insiam rem thei a; driver puitu tha bik a ken tel bakah dahna hmun a chep deuh a nih pawhin pawn atangin hun rem theih a ni,' tiin a him tawk em tih endiknaah India rama electric car zingah a him ber a nih thu a sawi.