Relpui vak kan ngai lo - Lalduhoma

Chief Minister Lalduhoma chuan nimin (22.9.2025) a ZPM chhung inkhawmah Pathian leh mipuiin kum 5 chhunga Mizorama rorel tura an thlan an nih avangin relpui vak an ngaih loh thu leh Pathian hlau si loa, hlauh tur dang ngah a that loh thu a sawi.

Lalduhoma chuan Pathian leh mipuiin kum 5 chhung rorel tura an thlan an nih avangin rorel chu an hna a nih thu sawiin, 'Tha kan tih angin ro kan rel ve ang, relpui vak kan ngai lo. Party dang leh NGO rorelah keini pawh kan inrawlh ngai lo, anmahni hmakhua a nia kan inrawlh lo. Rorellai MLA 27 ten mipui ai kan awh, chung miten tha an tih chu kan ti dawn a nimai a ni. Lo sawi lo sawi tur a awm lo,' a ti.

Kan ram tana tha turah chuan tanrual tlan a that thu sawiin Chief Minister chuan, 'Kan ram tana tha tur thlenga engkim sawichhiat dan ngawt mai an ngaihtuah hi chu pawi ka ti. Kan ram tan chuan tanrual theih chin neih tur. Keimahni leh keimahni kan inbeih kan inbeih chuan kan chak thei ngai lo ang,' tiin zahawm pawh kan zahawm loh tur thu a sawi.

Lalduhoma chuan Pathian hlau si loa, hlauh tur dang ngah em em chu a that loh thu sawiin, 'Hlauh tur pakhat chiah a awm, chu chu Pathian a ni. Pathian hi kan party leh sorkarin kan hlauh chhung chuan kan kal sual ngai lo ang,' a ti.