Refrigerated cargo-ah demand la awm lo

Mizoram BJP hruaitute chuan vawiin (23.9.2025) hian Aizawl Press Club-ah press conference koin, Sairang thleng rel a rawn luh tak avangin bungraw phurh man a tlawm ta hle tih an sawi.

MBJP Vice President Malsawmtluanga chuan vawi khat rel service wagon 42 zel a nih thu sawiin, 'Wagon khatah hian ton 28 bawr vel phur tura hisap a ni. Passenger train-ah hian Guwahati service-ah wagon li zel bungraw phurhna atana dah a ni a, Delhi service-ah wagon 2-3 dah thin a ni. Demand a san dan a zirin cargo wagon hi tih belh zel a ni dawn,' a ti.

Thlai thar leh a dangte thawn chhuahna tur atan ruahman refrigerated cargo chu demand a awm loh avangin telh a la ni lo tih sawiin Malsawmtluanga chuan, 'A function thei lo a ni loa, demand a awm rih loh vang a ni. Demand a awm hunah chuan a function nghal ang,' tiin oil vel erawh oil depot kan neih loh avangin phurh theih a nih rih loh thu a sawi.

MBJP Vice President sawi danin, rela bungraw phurhn man chu Sairang to Guwahati-ah kg. khat Rs. 2 niin, Sairang to Delhi-ah chuan kg. khat Rs. 3 zel a ni. Railways Ministry chuan bungraw phurh man hi a la bithliah fel loa, tuna rate hi chu lo hman lailawk a ni. Rate thar a chhuah hunah tun aiin a to dawn loa, a tlawm zawk beisei a ni.

By road chu Aizawl to Guwahati bungraw phurh man chu kg. khat Rs. 7 niin, Aizawl to Delhi chu kg. khat Rs. 20 a ni. Rel ngaihtuah chuan bungraw thang chhung a rei hle.

ILP check gate chungchang zawhna chhangin Malsawmtluanga chuan, "Railways lam pawhin ILP check gate hi dah belh an duhthusam leh an ngaihdan a ni. Sorkarin kalpui an tum dan erawh kan hre phak lo,' a ti.