Zirlaite laka thupha chawi turin phut

Mizo National Youth Front (MNYF) chuan vawiin (24.9.2025) hian Aizawl Press Club-ah press conference neiin, zirlaiten tribal scholarship chu kum 2023-2024 ah dawng kim loh kum 2024-2025 ah an dawn miah loh chhan an hmh chhuah thu an sawi a, zilaite hnena ngaihdam dil turin sorkar an phut.

MNYF Vice President Lalnunmawia Pautu chuan Mizoram zirlaite'na an nghahhlelh em tribal Scholarship chu kum 2023-2024 ah dawng kim loin, kum 2024-2025 ah an dawng miah lo tih sawiin, Zirlaite'n an chanvo scholarship a huna an dawn theih loh chhan hi MNF Thalaite chuan Ministry of Tribal Affairs leh Finance Ministry hnuaia Department of Economic Affairs-ahte chhuiin, Mizoram Sorkarin Scholarship Scheme chu a department changtute pawh rawn loin SNA SPARSH MODEL (Single Nodal Account-System for Pension Adminis tration RAKSHA)-a a lo on board (ziahluh) vang a ni tih kan hmu chhuak. Hmanhmawh tak leh a scheme enkawitu Mizoram Scholarship Board pawh rawn loa a ruk a rala he scheme SNA SPARSH Model System a on board chhan hi SASCI loan puk tam duh vang a ni tih pawh phat rual lohin a chiang niin kan hria a ni,' an ti.

Lalnunmawia Pautu chun July 7, 2025-a Ministry of Tribal Affairs-in Mizoram Sawrkar hnenah Rs 50,42,81,000 a rawn pek tawh laia vawiin thlenga zirlaite hnen a la thleng lo hi hriatthiam har an tih thu sawiin, 'ZPM Sorkar hian a lo tihdik lohah mawh lain Zirlaite Scholarship pek vat a nih theih nana tihfel ngai chu tifel zung zung rawh se. CSS Scheme-te SNA SPARSH Model-ah on board  mek zel a ni tih kan hria a, CSS tam tak on board loh a la awm laia a portal-ah pawh Mizoramin duh duha thuneihna a neih lohna scheme, zirlai tam tak tawrhna thlen thei ni si sum puk tam nana an lo dahhkham hi a pawi em em a ni. MNF Thalai chuan kum 2023 a ZPM-in sawrkarna an chan atangin tun thleng hian zirlaite'n Scholarship an dawng mumal thei ta lo hi pawi kan ti a, record-a a lan danin kum 2023-2024 session zirlai 3981-in scholarship an la dawng kim lo a, kum kalta 2024-2025 session post matric zirlai 28459 leh pre-matric 8788-te'n scholarship an la dawng miah lo a ni,' tiin hei hi ZPM Sawrkarin zirlaite a ngaihsak tawk loh vang leh sorkar sum enkawl dan an thiam tawk loh vang a nih thu an sawi.