MSPMC Annual Report tlangzarh

Chief Minister Lalduhoma chuan vawiin (24.9.2025) hian CM Conference Hall-ah Mizoram State Project Monitoring Committee (MSPMC) Annual Report 2024-25 a tlangzarh.

Lalduhoma chuan Project Monitoring Committee chu Mizoram mipui aiawh zo tak ni tura din a nih thu sawiin, 'Member tam tak nei vek pawl hrang hrang hruaituten thukhat vuaa kan rama hmasawnna hnathawh in endikho hrim hrim pawh hi a ropui a ni. Rawtna tha tak tak in rawn neih tawhte rinchhanin kal dan tha zawk kan kalpui a, a tangkai em em a ni. Annual Report hmasaber in han zo va, tun atang chuan kan sorkar hnua kan hmalakna lamte in en tan thei tawh dawn a, a tir atanga in vilpui hnate chu a tha tawh hle turah kan ngai,' a ti

Kan ram tan hna tha in thawk mek a, in thawh tawh chinte pawh a tha tawk hle tih sawiin, 'Tumah hlau suh u. Ruling mi leh sa nih chhuang an lo awm a nih pawhin hlau suh u, in lamah kan tang zel ang,' tiin an hmalak zelna turah huai taka kal turin a chah a ni.

Kum 2024_ 2025 sawrkar kum chhungin Mizoram State chhunga project sawmli pasarih (47) an tlawh zinga sawmli pahnih (42) te chungchang he Annual Report-ah hian dah a ni a. Project kal lai mek ni tawh lo, hman tangkai loha dah tawl tak, uiawm tak tak Mizoram Polytechnic Buildings district panga - Champhai, Kolasib, Mamit, Lawngtlai leh Siaha a mite tlawh telin, an dinhmun theuhte he report-ah hian dah tel a ni.