FCS&CA-in order chhuah niah cancel lehnghal

Food Civil Supply & Consumer Affairs (FCS&CA) Director chuan nimin (4.2.2025) khan office order ti chhuakin, e-KYC ti lote chu ration card atangin an hming paih vek tur a nih thu a tarlang. Nimin vek khan order hi a cancel leh rih. 

Nimina order a tih chhuahah Supreme Court thupek bawhzuiin, Sorkar Laipui hnuaia Food & Public Distribution chuan state sorkar tinte chu NFSA hnuaia benificiary zawng zawngte e-KYC ti tura hriattirna a chhuah thu FCS&CA Director chuan a tarlang a, 'Hemi chungchangah hian DCSO-te'n mahni bial chhunga NFSA benificiary zawng zawng, ration card-a an hming chuang tawh phawt chu e-KYC anmahni ration card neihna retailer theuhah biometric authentication (fingerprint) tih tir ṭheuh tur a ni,' a ti.

FCS&CA Director tarlan danin, e-KYC hi February 28, 2025 hma ngeia zawh hman tur a ni. Sorkar laipui thu chhuak angin e-KYC ti ve lo benificiary-te chu ration card atanga an hming paih an ni ang.

e-KYC tih dan tur :

* e-POS ah home screen-ah kal tur

* Issue thlan tur

* IMPDS thlan leh tur

* IMPDS-a e-KYC-ah kal tur

* Ration card number chhut luh tur

* Chhungkaw member list lo lang a mal te tea thlan tur

* Scan FP hmeh tur

* Benificiary Adhaar number chhut tur

* Fingerprint hmeh tur

Nimin vek khan FCS&CA Director hian order chhuahin, khawl lamah inpeihfel lohna a la awm avangin thu leh awm hma chu e-KYC chugchang hi cancel a ni tih a tarlang.