MZP-in Vice Chancellor sawipui
admin 05-Feb-2025 05:05 PMMZP hruaitute chuan Mizoram University (MZU) Economics Department-a zirtirtu chungchangah zirlai atanga complaint an dawn avangin vawiin (5.2.2025) chhun khan MZU Vice Chancellor Prof. Debakar Chandra Deka hmuin, an sawipui.
MZP tarlan danin, Dr. Akshaya Kumar Mohanty, Associate Professor, Dept. of Economics; MZU laka zirlaite aṭanga complain an dawn bawhzuiin MZP hruaitute chuan Vice Chancellor hi a pisaah an hmu a, zirlaite harsatna thlenna hmun Students Grievance Redressal Committee (SGRC), MZU-in hmalâkna report an la nei lo chu hriatthiam har an ti hlê tih sawiin, a rang thei ang bera Dr. Askhay hian a phu tawk hremna a hmuh ngei theihna turin hma la turin an ngen.
February 2025 chhung ngei a hmalakna a awm lo a nih chuan na takin MZP chuan hma an lak chhunzawm tur thu an sawi.
Dr. Akshay Kumar chungchanga June 16, 2024 daih tawha MZU Registrar kaltlanga zirlai 20 chuangin amah complaint na lehkha an thehluh bawhzuina report engmah la awm loh mai bakah, zirlai tam tak amah avanga rilru lama harsatna tawk hial leh kutthlak hial a neih thute hriat hian an rilru a ti na hle tih tarlangin MZP chuan, 'Hetiang zirtirtu hi MZU a thawk reng tlakah kan ngai lo. Zirlaite hmakhua ngaiin VC hi a rang thei ang bera hma lo la ngei turin kan ngenin kan hriattir nghal a ni,' an ti.
