Leiletah kuhva rah phur an man

Vanzau Branch YMA leh Dungtlang Police tangkawp chuan vawiin (5.2.2025) chhun khan Khawbung ram chhunga Tuiaw Leiletah kuhva phur lirthei pahnih an man.

Vanzau Branch YMA hruaitute hnen atanga thudawn danin, tunlaiin an khaw kaltlangin kuhva phur lirthei tlan thinin kawng a tihchhiat nasat tawh avangin January 29, 2025 khan an khaw ram chhunga kawnga tlan an phal loh thu thuchhuah an siam a ni.

Vanzau Branch YMA hruaitute chu duty-in kuhva phur lirthei tlan hi an veng a, nizan zanlai pelh khan kuhva phur lirthei hian an khaw chhung a paltlang tih hriain, Dungtlang Police Station an hriattir a, umzui nghalin, Vanzau leh Khawbung inrina, Tuiaw lui-a Khawbung leilet-ah nang chingin, lirthei pahnih, SML ve ve hi an man ta a ni. 

Heng lirtheite hi Champhai atanga chhuak niin an sawi a, lirthei khalhtute hi Vaphai khaw mi, Lalawmpuia leh Bungzung khaw mi, Lalchhuanpuiate an ni a, vawiin khan Champhai Custom-te hnenah an hlan nghal a ni.

Vanzau Branch YMA chuan, an khaw ram chhungah dan lova kuhva phur kaltlang an awi lo a, phur tlang lui an awm a, man an nih chuan thuneitute hnenah hlan zel an ni dawn tih an sawi.