Pangzawl Branch YMA-in thuchhuah siam

Pangzawl Branch YMA chuan an member Valentine VL Chhana s/o H Malsawmtluanga, Kerala-a a zirlaipuiin a vih hlum chungchangah thuchhuah an siamin.

Pangzawl Branch YMA chuan, 'Kan member duhawm tak, Valentine VL Chhana, Kerela-a mechanical engineer final year zir mek chu February 22, 2025, Inrinni zanah, an zirna hmunah a Mizopui ngeiin khawngaihna tel miah loin a that a ni. He thu hian Pangzawl khua leh Mizo thinlung a tina tak zet. Valentine-a hi 'mi zaidam tak leh mi rilru tha tak a ni' tih hi khawtlang mipuiin amah kan hriatdan a ni,' an ti.

He tualthahna hi a pawi tiin, a rapthlak an ti takzet tih tarlangin Pangzawl Branch YMA chuan, 'Hetiang thil hi tu chungah mah thleng nawn leh tawh lo se kan duh takzet. Pawikhawihtu hi, thuneituten a phu tawk ang ngeiin, dan angin na taka hrem ni ngei se tih hi kan phut tlat a ni,' tiin lusun chhungte leh he thihna avanga thinlungna taka awm zawng zawngte, Lalpan thlamuanin awmpui vek se an duh tih an tarlang.