Baryl-i'n award a dawng

Nizan (24.3.2025) khan Federation of Indian Chamber of Commerce and Industries (FICCI) hnuaia Women’s Wing, FLO-te chuan Annual FLO Women Achiever’s Award, 2025 chu North-East a hmeichhe hlawhtlingte hnenah an sem a, Mizoram atangin Aizawl South-III Bialtu MLA Baryl Vanneihsangi'n a dawng.

Annual FLO Women Achiever’s Award hi Taj, Vivanta Hotel, Guwahati-ah sem a ni a, he hunah hian Assam Governor, Lakshman Prasad Acharya chu khuallian a ni.

FICCI Ladies Organisation (FLO)  hi kum 1983 a din a ni a, state hrang hranga hmeichhe hlawhtlingte lawmpuina award hi kum 10 chuang an lo sem tawh a, an award hian pofessional line hrang hrang a huam a, Mizoram atangin zai lamah Mami Varte-in a lo dawng tawh a, thu dawn danin hun rei tak hnuah Mizoramin he award hi kan dawng ve leh a, Baryl-i chu politics a hlawhtlinna avanga Award dawngtu hmasa ber  a ni.

Nizan Award semnaah hian Baryl-i bakah Assam Biker, ram 67 tlawhchhuaktu Meenakshi Das te, Manipur Folk Singer leh Business Women hlawhtling tak te hnenahaward hlan a ni. Tin, FLO Award hi chi thuma then a ni a, Women Achiever’s Award bakah Trailblazer leh Chapter Award sem a ni a, a hnuhnung pahnih hi an local mi hlawhtlingte hnena sem thin a ni.

Mizoram aiawha dawngtu Baryl-i chuan FICCI FLO Award dawng tura duhsakna a dawng leh hriat a lo ni ve chu a tan chuan thil hlu tak a nih thu a sawi a, 'Hmeichhiate politics-a an tel hi ‘intluktlanna’ atana a pawimawh mai a ni lova, khawtlang nun nuam zawk leh inclusivity neihna kailawn a nih avangin a hlu takzet a ni,' a ti.