ZPM vote tute an beidawng tawh - Nunmawia Chuaungo

MPCC chuan vawiin (13.6.2025) chhun khan an office-ah chhung inkhawm an hmang a, thusawitu MPCC Sr. Vice President Lalnunmawia Chuaungo chuan ZPM lo vote tawhtute an beidawng tawh nia sawiin, ' ZPM te hian thil tha tinreng intiamin mipuiah an inzuar a, mahse, thil tha lo kan ti loang an tihte an ti vek a, thil tha kan ti ang an tihte tih a lawi an la nei lo,' a ti.

Thingtlang lam unauten ZPM an bawhna chhan chu an thlaite rate hresa in inhralh tawh ang a, inthar ang angte kan leisak ang che u an tih vang nia sawiin Lalnunmawia Chuaungo chuan, 'A rate nen lam campaign material siamin an thehdarh chuai chuai a ni. Kan mi leh sate pawhin party chhuahsan chuang loin ZPM an vote phah a ni. A chhan chu lote an vat a, party dangin sawhthing chu ti zat in kan lei ang kan ti ve si loa, theihtawp chhuaha an hnathawh rah seng thei turah inngaiin ZPM candidate te vote vak an ni. Mahse, an han sorkara session hmasa berah ni li chhung lekin thlai thar lei nan vbc. 110 kan dah an ti,' tiin Governor pawh kumin financial year hian thlai thar kan lei nghal dawn a ni an tihtir thu a sawi.

MPCC Sr. Vice President chuan kum kan hmang liam a, vbc. 110 an dah atang khan cheng khat pawh kut hnathawktute thlai thar lei nan an hmang lo tih sawiin, 'A lei tura tutu emaw an rawihte chuan cheng nuai 10 dawn an hmang a, kut hnathawktute kutah engmah a lut lo. Kum a thara 2024-05 kum a zo va, enga lawi tih an nei lo va, kum 2025-ah phei chuan thlai thar leina tur dah bik an nei lo a ni. Kumin hmunphiah lei season ah a leitu tur empanelled firm pariat an dah a, chung zinga panga chauh chuan hmunphiah an leisak. grade A Rs 100  in kan lei ang a, grade B Rs 80/- in kan leisak ang tia an tiam angin an leisak leh chuang lo,' a ti.

Lalnunmawia Chuaungo chuan sorkar document-a a landan chuan chhungkua 25,327 in acre 405.50 velah sawhthing an ling  tih sawiin, 'A chi a an lin zata hi quintals 1,69,395 niin hei hi sorkar report dan a ni. Mizorama sawhthing thar tura hi quintals 14,83,253  niin sorkar in a chhut. June thla thleng kan lei ang an tia, May 20 ah pawh quintal nuai khat an lei tling awrh chauh. Chutiang khawp chuan mipui tan harsatna an thlen nasa a, mi tam takin cho ngam lovin an la phum mai mai a ni. May 20 thlenga sorkar in an leisak chu 1,14,622 qtls a ni a, kut hnathawktuten a chi a an lin zat pawh an la leisak lo,' tiin mipui tan harsatna an thlen nasa a, mi tam takin cho ngam lovin an la phum mai mai niin a sawi.