CM-in Tuichangral Championship a hawng

Vawiin (1.4.2025) hian E. Lungdar Mini Sports Complex-ah Chief Minister Lalduhoma chuan Tuichangral Championship 2025 a hawng a, infiammite chu chak tuma theihtawp chhuaha bei thin, chak loh pawh thiam, beidawng ve ngai si ni turin a chah.

Chief Minister chuan kum 1970 chho atanga lo kalpui tan tawh he intihsiakna hian ngaihhlut a hlawh thin a, 'Tuichangral Games tiin kan hria a, Mizoram a deng chhuak thin. Infiamna ngaina tak in nih avangin infiammite pawhin an chhawr a. Mizoramin Olympian pahnih chauh kan la nei a, chu ta pakhat zawk chu E. Lungdar chhuak, C. Lalremsanga, Archer a ni. Tun hnaiah professional footballer eng emaw zat in chher chhuak,' a ti.

Infiamna tam tak hi eizawnna tlak a nih tawh avangin a bei tak takte tan chuan hlawhtlin theihna leh ram leh hnam chawimawina a nih thu sawiin Lalduhoma chuan, 'Vawiina intihsiakna bei tura lo kal te zingah pawh, talent nei tha, tih tak taka beitu tam tak in awmin ka ring. Theihtawp chhuahin, hlawhtlin ngei tumin bei ang che u. Ka sawrkar hian kan naupang talent nei tha te zawn chhuah a, training tha tak pea, Olympic 2036 a India aiawh thei khawpa buatsaih kan tum,' tiin Tuichangral Championship pawh hi naupang talent zawn nan kan hmang dawn a ni.

Lalduhoma chuan kan thalai tam takte ruihhlo vangin an thi zawih zawih tih sawiin, 'Nangni Tuichangral thalaite erawh hi chu heng nun kawng dik lo lakah hian lo fihlim ula, zuk leh hmuam leh ruihhlo tih ai chuan infiamna lamah in hunawlte lo hmang zawk ula, in rilru leh taksa tan a that bakah ram tan pawh a tha a ni,' a ti a, 'intihsiakna beitute zawng zawng duhsakna ka hlan a, chak tuma bei, chak loh pawh thiam, beidawng ngai lo, lo ni theuh ang che u,' tiin a chah.