Khawtlang thupek angin chhuak

Vohbik naupang Lalremruata (11) s/o Lalvulmawii, Mamit Chhimveng rawng taka August 17, 2023-a thattu puh R Lalrinchhana s/o R Remlalnghaka, Mamit High School Veng chuan an veng a chhuahsan tawh.

R Lalrinchhana hian an veng leilung a rap leh nia an hriat avangin Mamit Chhimveng VC leh All NGO ni 17.5.2025)l a thukhawm chuan R Lalrinchhana hi vawiina an veng chhuahsan nghal turin an hriattir.

Mamit atanga Bengvarna thudawn danin, hemi ni hian khawtlang hruaitute chu R Lalrinchhanate inah hian kalin, a mu lai an kaih thawh tir a, a sahimna atan an veng chhuahsan nghal turin an hriattir. Chumi hnuah R Lalrinchhana hian an veng a chhuahsan.

Mamit Chhimveng VC leh All NGO chuan, 'Tun hnuah Mamit Chhimveng leilung a rawn rap leh tih hriat a nih chuan, a chungah leh a chhungte chungah eng pawh thleng se, an cho chhuah a ni ang,' tiin, he tualthihna avanga August 29, 2023-a VC leh All NGO huaihawta khawtlang huapa kawng an zawh tuma resolution an pass tawh khawng taka kenkawh nise, an ti.

R Lalrinchhana hi Mamit atangin Central Jail-ah dah a ni a, medical thi avangin bail-in a chhuak lailawk.

Tarlan tawh angin, Lalremruata hi August 17, 2023 atangin chin hriat lohin a bo a, August 23, 2023 ah thia hmuh a ni. Rinhlelh thila Mamit Police-te'n an man R Lalrinchhana chuan August 25, 2023 khan hursualna thila a thah a nih thu police hmaah a puang. R Lalrinchhana hian thurualpui nei loin, amahin Lalremruata hi a that niah police-te chuan an ngai.

Kawng an zawh tuma an resolution : 

1. Vohbik Lalremruata rawng tak a thattu R Lalrinchhana s/o R Remlalnghaka hian a dam chhungin Chhimveng huam chhung hi a rawn rap tawh tur a ni lo.

2. R Lalrinchhana'n a tualthah chhan a sawiah kan lungawi tawk lo hle a, hei aiin a thah chhan hi chiang zawk a hriat a nih theih nan thuneitu ten chhuichhuak rawh se.

3. Tualthattu hi a na thei ang ber a hrem ni rawh se.

4. Tualthattu hian thurualpui a neih ngei kan ring a, thuneituten arang thei ang berin chhuichhuak rawh se.