Mizo Territorial Army sawifiah

Mizo hlang awmna Mizo Territorial Army din tur buaipui tura Mizoram Sorkarin a din Coordination & Land Search Committee Chairman Lt. Col. Clement Lalhmingthanga nimin (10.6.2025) khan Aizawl Press Club-ah press conference neiin, a kalphung tur a sawifiah.

Mizoram Territorial Army kalphung tur thenkhat :

* An hlawh leh senso dang zawng zawng Central Sorkar tum tur a ni

* Company hnih din a ni phawt dawn a, company khatah mi 102 zel an awm dawn. Officer pakhat, Junior Commissioned Officer (JCO) pali leh rank dang 97 an awm ang.

* A tum khatna atan mi 75 lak phawt an ni ang, an training chhuahah a dang lak belh zel an ni ang

* Mizo Territorial Army lakna chu July 26, 2025 ah Aizawlah neih tan tum a ni. Aizawlah vek lak a ni dawn a, district hrang hrang tan a in chhawkin hun hawn a ni ang

* A tul angte buaipui zawh a nih hnuah November, 2025 ah Assam Regiment Training Centre, Shillong-ah training tir tum a ni

* Mizo dik tak, HSLC pass, kum 18 atanga kum 42 inkar tan dil theih a ni dawn

* An hlawh chu army-a an rank pui ang hlawh a ni ang

* Company hnih hi Aizawl leh Lungleiah dah tum a ni a, a hmun tur thlan fel a la ni lo

* Territorial Army Bn. (H&H), Assam enkawlna hnuaiah Mizo Territorial Army hi a awm rih phawt ang. Kum 4-5 hnu velah battalion puitling a nih theih beisei a ni