MJA-in chawimawina an hlan

Mizoram Journalist Association (MJA) chuan vawiin (12.7.2025) hian Aizawl Press Club-ah an member chawimawina sang dawngtu HC Vanlalruata leh Issac Zoramsangate chawimawina an hlan.

Chawimawina sem inkhawmah hian MJA President C Lalrambuatsaiha chuan MJA tan ni chhinchhiah tlak tak a nih thu sawiin, 'Chawimawina ropui tak dawng, chawimawi tur kan nei hi a lawm takzet. Thil ropui tak inpe thei lo mahila, chawimawina inhlan hian a tum chu kan member-te in cho phur a, tan an lak zelna atan a ni,' a ti.

MJA hian an danah chawimawina pek tur chin bituk an nei a, chungmite hnenah chuan chawimawina thuziak leh Rs. 10,000 an hlan thin.

Kumtina sem chhuah thin, News & Documentary Emmys Awards chu tunhnai khan National Academy of Television Arts & Sciences (NATAS) bultumin Palladium Times Square, New York-ah sem chhuah leh a ni. 

Award dawngtu zingah Mizo journalist pahnih, HC Vanlalruata leh Isaac Zoramsangate telna, 'Myanmar’s Civil War' chuan 'Outstanding Continuing News Coverage – Short Form' category-ah award a dawng. An pahnih hian producer an ni.