CM honorary doctorate degree an hlan

Vawiin (12.7.2025) hian Karunya Institutes of Technology & Sciences (Deemed to be University), Coimbatore, Tamil Nadu chuan an campus-ah convocation vawi 31 na an hmang a, Chief Minister Lalduhoma'n khuallian niin a hmanpui a, honorary doctorate degree an lo hlan nghal.

Chief Minister chuan Karunya University-in honorary doctorate degree an pek chu an rawng a bawlsak mek Mizoram, ziak leh chhiar thiam vekte chenna (fully literate state) ram mipuite aiawhin dawn  a tih tluk thu sawiin, 'Zirnain hmasawnna leh changkanna min thlen zel a ni tih lantirnaah ka ngai,' tiin honorary doctorate degree hlantute lawmthu a hrilh.

India rama zirna in tha tam tak hi Kristiante din leh enkawl an nih thu sawiin Lalduhoma chuan, 'Zirna te, hriselna te, hnuchham enkawlna leh khawtlang rawngbawlna kawng dangah pawh, ram pum huapa mipui awm zat atanga tehin tlem hle mah ila, ringtute hian kan thawhhlawk thin. Karunya University pawh hi chutiang rilru pu chunga din a ni,' a ti.

Chief Minister chuan zirlai hlawhtling tharte hnenah thu chahin, 'Tih tum bul fuk nei lo va hlawhtlinna chu a pawnlawi fo,' tiin ram leh khawtlang tana mi tangkai tak nih tumna neia an kawng zawh zel turin a fuih.

Karunya University-in CM hnena honorary degree an hlan chhan an ziah dan chu 'Executive Council of Karunya Institute of Technology & Sciences (Deemed to be University) chuan hmingtha taka khawtlang rawng a bawl thinna te, hmathlir tha tak nei ram hruaitu a nih vang te, remna leh muanna a awm theih nana nghing lo va a inpek thinna te, hmasawnna leh mipui sawrkar dinna kawnga a hnathawh tha tak tak te avangin Pu Lalduhoma, Chief Minister of Mizoram hnenah Doctor of Letters (Honoris Causa) a hlan' tih a ni.