Raltlante in report hmasak tur

Ni 14.7.2025 zana Chhinga Veng Local Council leh All NGO Meeting an veng chhunga raltlan awm tur reng reng, Local Council Secretary hnenah emaw Br. YMA Secretary hnenah emaw inreport hmasak zel tur a nih thu an tarlang.

Chhinga Veng LC leh NGO-te'n an rel dan chuan Chhinga Veng chhunga inluah thar tur reng rengin, Local Council leh Br. YMA-ah pem lehkha an theh lut hmasa zel tur a ni. In neitute pawhin bungrua nena an rawn insawn luh hmain, pem lehkha hi lo phut hmasak zel tur a ni ang.

Chhinga Veng chhunga dawr luah tur nei reng reng ten, pem lehkha nei, voter ID nei ngei lo chu dawr luahtir loh tur a ni.  Veng dang aṭanga dawr luah tur pawhin an awmna veng aṭanga khua leh tui dik tak nihna nei ngeite chauh luahtir tur a ni. 

Chhinga Veng chhunga in nei zawng zawng te, an inluahtuten pem lehkha an neih leh neih loh August thla chhung ngeia lo finfiah turin an ngenin, an hriattir.

Chhinga Veng chhunga inhmun lo ram hralh tur neiten India khua leh tui dik takte hnenah chauh hralh tur a ni.