Contract hna chhe hlir min hlui - ZPM Thalai

ZPM Thalai chuan vawiin (9.2.2023) chhun khan Mizoram Institute of Comprehensive Education (MICE) School, Tuikual South a mi an tlawh contract hna chhe hlir mipuite hluiah Mizoram Sorkar an puh.

MNF Sorkârin contract hna chhe lutuk hlir min hlui nia tarlangin ZPM Thalai chuan, Mipuite hmuhsitnaah kan ngai. CBSE school kan neih ve chhun lehzel pawh hetianga phuailuaia min hlui duh sorkâr kan hrawn hi vanduaithlak kan ti. MNF Sorkârin zirna thu tak hla takah a ngaih lohzia a lang chiang hlein kan hria, an ti.

ZPM Thalai tarlante :

* Laboratory room tur a bo, a chhawng hnuai bera room tih pum a ni lo

* Retaining wall pawh hi a awm zat tur a awm kim lo niin kan hria

* Retaining wall hian school building a do vek tur nia a lan laiin, a then laiah chuan a beam chinah chauhte a do

* Ruah sur huna tui hawk luanna tur leh tui chhe luanna tur hrim hrim tui luankawr engmah hmuh tur a awm lo

* School building chung berah railing (vawn ban) siam vek tur nia ngaih a nih laiin, railing hi hmun tam zawkah siam a ni lo

* Floor tinah naupangten zunram thiarna an nei tur nia a lan laiin third floor-ah chiah toilet siam a ni

* Rikrum thila chhuahna tur (emergency exit) pawh siam a ni lo

* Rualbanlote kalna tur siam tura ruahman a nih laiin, hetiang hi hmuh tur a awm hek lo. 

* Bang a lai leh a sira khi chat a tam hle a, kawngkhar chokut-te pawh themlem te te hman a ni