India aiawhin Mizo tlangval pahnih
admin 29-Jul-2024 04:36 PMReuben Lalchuangkima s/o C.Lalrinthanga(L), Chanmari West leh Lalchhuanawma Siakeng s/o R. Lallunghnema, Model Veng te chu khawvel cosplay intihsiakna lian berte zing a mi World Cosplay Summit 2024, September 1-5 a Japan-a neih turah India aiawh tura thlan an ni.
Anni pahnih hi India rama a team tha zual 12 inelna, June 1, 2024 a neih ah pakhatna dinhmun lo hauh tawh an ni. Anni hma hian Mizo tlangval pahnih Reuben Zorindika leh Dominic-ate chu India aiawh in kum 2019 khan an lo han kal ve tawh.
He championship hi kut themthiamna leh an lemchan thiamna bik endik chungchang ah an khirh hle a, ram 35 lai an tel dawn a, an intihsiakna tur hi khawvel a tha ber nih theihna tur championship a ni nghe nghe.
World Cosplay Summit intihsiakna hi 2003 a tang khan Japan ah neih tan a ni, ram pakhat a tangin team khat thlan chhuah an ni thin. Member pahnih zel team khatah awmin, an kut themthiamna mai ni lo an character cosplay turte chu an original character an pho chhuak reng em tih te endik thin a ni.
Reuben Lalchuangkima leh Lalchhuanawma hi Mizoram Cosplay Organization member niin, kum 10 chuang cosplay ah hian an lo in hnamhnawih tawh a, bih chiang duh tan instagram (ig) lamah sakataryu tih leh puia_r_naru tihin an in dah a ni.
World Cosplay Summit, Japan ram a intihsiakna tur ah hian Japan anime show lar tak Naruto Shippuden a mi Hashirama Senju leh Madara Uchiha lem changin an art leh creativity an han phochhuak ve dawn a ni.
