CYMA-in inthlah thuchah a ti chhuak

Central YMA chuan India ram puma entawn tlak Inthlanna felfai leh muanawm tak kan neih leh ngei theihna turin inthlan thuchah an tihchhuah leh thu tarlangin, 'He inthlan thuchah hi ngai pawimawh a, zawm ngei turin Mizoram mipuite leh political party tinte kan ngen a ni, ' an ti. 

Central YMA-in inthlan thuchah a chhuah thinte an ngaihpawimawh sak a, an zah der sak thin avangin Mizoram mipuite leh political party-te chungah lawmthu an sawi. 

CYMA inthlan thuchah : 

1. Kan ram rorelna hi mipui siam a ni a, a chhiat a thatah mawhphurtu kan ni tih hriain, khua leh tui dik takte chu vote thlak theuh turin kan inngen a ni.

2. Mizo hnahthlak zingah chibing/kohhran bil inthliar hrang zawnga chetna hi Central YMA chuan tha a ti lo. Kan hmaa Inthlanna kan neih turah pawh chutiang zawnga hma la lo tur leh chibing/sakhaw bing puala Candidate siam lo turin Political party leh mipuite kan ngen a ni.

3. Political party hrang hrangte leh party official candidate ten khawtlang huapa ruai siam hi Central YMA chuan tha a ti lova, tumahin hetiang zawnga khawtlang huapa ruai siam lo turin kan ngen a ni.

4. Aurinna hman chungchangah political party tin ten Sorkar-in a phal dan ang bak leh khawtlang tana ninawm leh hnawksak thei tur ang chi chu tih loh hram ni se.

5. Candidate te hi ram hruaitu turte an nih avangin zu ruih hmangte, eiruk chingte leh nungchang thlahdahte an lo awm palh a nih pawhin vote loh ngam nise.

6. Naupang kumtling lo leh thil kalphung hre pha lote, inthlan boruaka hnuh luh loh leh hmanrua a hman loh nise.

7. Party manifesto-ah a taka tihhlawhtlin theih ngei tur chauh tarlan nise.

8. Inthlanna muanawm, boruak tha tak hnuaia kan neih theihna turin thlangtu mipuite leh mawhphurtu zawng zawngte theihtawp chhuaha tan la turin kan ngen a ni.

9. Hmanraw thianghlim lo chelekna reng reng hi kan duh lova, mitinin an chhia leh tha hriatna thiang leh zalen tak hmanga vote an thlak theih nan sum leh therhlo dang hmanga vote lei leh hralh hi tih loh nise, mipui, pawl hrang hrang leh Kohhrante pawhin party leh candidate-te sum leh thildang dil loh nise.

10. Social Media hrang hrangah thubelhchian dawl lo leh finfiahna awm lo ang chi, party hamthatna atana thehdarh loh ni se.